Read Toraja-Sa'dan AYUB 27 Bible Online

AYUB 27 - Toraja-Sa'dan bible

AYUB 27

¹Napatarru’mi Ayub umpokadai tu kada peada’na nakua:

²La lelukraka tuoNa Puang Matua, tu umpadapa katonganangku, sia la lelukraka tuoNa To umpoissan angge maritik tu umponnoi penaangku kamapairan,

³ianna nii tongan siapi penaangku tu kaleku, sia pa’pamurru’Na Puang Matua lan to’tok illongku,

⁴manassa iatu pudukku tae’ anna la umpokada tang malolo, sia iatu lilaku tae’ anna la ussa’bu’ buttok.

⁵La toyang dio mai kaleku tu la ussanda tongannikomi; sae lako ka’tunna sunga’ku tae’ angku rampanan kadangku, kumua tae’ kukasalan len.

⁶Kupatontong unnakui tu kamaloloangku sia tae’ kurampananni; iatu penaangku moi misa’ alloku tae’ napasalai.

⁷Iatu a’ganna ualingku dennoupa’ nasusi to tang mekaaluk, sia iatu to umbalina’ la susito leko’ penaanna.

⁸Belanna apara tu narannuan to tang umbilang Puang Matua, ke Naka’tumi Puang Matua tu sunga’na, sia ke Natuntunmi tu deatanna?

⁹La Naperangiiraka Puang Matua tu petambana umpalaku pa’tunduan, ke narampoimi kapussakan?

¹⁰Ma’dinraka umpoparannu To umpoissan angge maritik, sia metamba la massambayang langngan Puang Matua, lan mintu’ attu?

¹¹La Kuada’ikomi pa’patudu limanNa Puang Matua, sia iatu apa lan penaanNa To umpoissan angge maritik tae’ angku la umbunii.

¹²Inang mintu’komi untiro kalenai: ma’apari ammi ma’tangnga’ tae’ gai’na?

¹³Inde sia tu taana to tang mekaaluk dio mai kaleNa Puang Matua sia taa mana’na to ma’pakario-rio, tu natarima dio mai To umpoissan angge maritik.

¹⁴Iake samemba’ka-ba’ka’nai tu anakna iamo kandena pa’dang, sia iatu bati’na tang napedia’i kande;

¹⁵minda-minda tu tinampe siapa dio mai tau iato, dilamun narampoi saki ropu, sia tae’ nabatingi baine balunna tu tau iato mai.

¹⁶Moi anna popa’toppo’i tu doi’na susito barra’-barra’ sia napasadia tu mai pakeanna susito losso’ pitti’,

¹⁷naparandanmo, apa to malambu’ ia tu la umpakei, sia to tang kasalan untaai tu doi’.

¹⁸Ia umbangunni banua susito panggaraga busung, ba’tu misa’ lantang, susitu nagaragai to ma’kampa.

¹⁹Umbambangan kalena mamma’ situang kasugiranna, apa tae’ nama’din umpogau’ pole’i, umbangunan matanna, anna moi misa’ apa tae’mo natiro.

²⁰Pa’patiramban untu’ba’i susito uai saba’, iake bongi natuli angin bara’ male;

²¹napettiaran, angin rampe matallo, anna pa’de; sia nasabak male dio mai inanna.

²²Puang tang ungkasayangi umpanai, la madomi’ mallai urrampanan kalena dio mai limanNa Puang.

²³Massala’pa-la’pa tu mai tau diona tau iato sia ma’uik-uik untellei, kemalei untampe inanna.