Read Toraja-Sa'dan AYUB 28 Bible Online

AYUB 28 - Toraja-Sa'dan bible

AYUB 28

¹Den duka tu padang nanii tau umpabu’tu salaka, sia inan tu nanii tau unnembong bulaan;

²iatu bassi diala diong mai padang sia batu dikombong anna dadi gallang.

³Natappui tau tu kamalillinan, sia sumpu sae rokko nanii tau umparessai tu membatunna lan kamalillinan sia lan kapittukan.

⁴Nabo’bok tau tu pambo’bok pangembongan sitoyangan tu naninna tau; mendoyang tu tau sia tae’ namellese, sitoyangan tau tu nanii mempoyang.

⁵Padang nanii bu’tu kande — diong padang iato nasuale tau susito pa’kandean api.

⁶Iatu membatunna nanii tau ungkabu’tui batu lasuri’, tu untambuk bulaan bubuk.

⁷Iatu lalan lako — moi langkan tae’ natandai, moi mata pa’bulan tae’ duka natiroi;

⁸iatu olo’-olo’ masa’ga’ tae’ duka nalesei, tae’ duka natengkai singa.

⁹Natoemo tolino tu batu makarra’ sia nasuale tu buntu randuk dio mai oto’na;

¹⁰napa’ lan tu buntu batu sia natiro matanna tu ma’rupa-rupa pareanan ballo;

¹¹nalepe’ tu kalimbuang ulunna salu, sia napabu’tu tu membuninna.

¹²Apa iatu kakinaan — umba dinii unnappa’i sia umbara nanii tu inanna patiro penaa?

¹³Iatu tolino tae’ natandai tu angga’na sia tae’ nadiappa’ lan tondok to tuo.

¹⁴Iatu uai mandalan ma’kada nakua: Iatu iannato tae’ lan kaleku sia ma’kada tu tasik nakua: Iatu iannato tae’ kusisola.

¹⁵Iatu iannato tae’ nama’din bulaan massang dibayaranni, sia tae’ duka nama’din ditimbangan salaka diallianni;

¹⁶sia tae’ duka nama’din dibutunganni bulaan matasak dio mai Ofir, sia tae’ duka nama’din ke ake’ ido ballo sia lasuri’.

¹⁷Tae’ nadipapada angga’na tu bulaan na sammin, sia tae’ duka nama’din dipasituka’ pareanan bulaan massang.

¹⁸Iatu gewang sia kinang tae’ angga’na ke dipasitintii, sia iake diampui tu kakinaan losong ia na iatu merdan.

¹⁹Tae’ nama’din dipapada angga’na parimata krisoli’ dio mai Etiopia, sia tae’ nama’din dibutunganni bulaan bubuk massang.

²⁰Iatu kakinaan iate — umbara nanii sae, sia umbara nanii inanna tu patiro penaa?

²¹Karerungan dio mai mintu’ apa kepenaa, moi anna manuk-manuk dao langi’ kabunian duka lako.

²²Iatu bambana mukkun sia kamatean ma’kada nakua: Kirangimo tu karebanna.

²³Iatu lalan lako kalena Natandai Puang Matua, Naissan Puang tu inanna.

²⁴Belanna Puang mentiro sae lako randan langi’, iatu mintu’ apa nasambo langi’ Natiro nasang.

²⁵IatonNa pamanassai tu kamatotoranna angin, sia Nasuka’ tu kauaianna,

²⁶iatonNa pantokki tu atoranna uran sia Napamanassa tu mai lalanna lila kila’,

²⁷attu iato Natiromi Puang tu kakinaan sia Napa’peissanan, Napadiomo to’ inanna sia tarru’ Naissan tu kakinaan;

²⁸apa lako tolino ma’kada Nakua: Manassa iatu kamatakuran lako Puang — iamo kakinaan sia toyang dio mai kakadakean, iamo patiro penaa.