Read Toraja-Sa'dan AYUB 29 Bible Online

AYUB 29 - Toraja-Sa'dan bible

AYUB 29

¹Napatarru’mi Ayub umpokadai tu kada peada’na, nakua:

²A’a, kengku susiopara tonna bulan dolo, susi tonna allo nanii Puang Matua ungkaduttu’na’;

³tonna padukkui Puang tu lampunNa dao ulungku, naarrangna’ tu dukkunNa tongku lumingka lan kapittukan;

⁴susi tongku potendengpa tendengku, tonna kadamakpa’ Puang Matua lan tendaku;

⁵tonna rondongpa’ To umpoissan angge maritik, sia iatu mai anakku denpa untikuina’;

⁶tongku lumingkapa lan to’ dadi’, anna iatu buntu batu kusikandappiran umpatibollomo salu’-salu’ minna’.

⁷Iake tassu’na’ lako to’ babangan kota, angku mesua umbaai tu isungangku lako tana lapang,

⁸manassa membuni tu pia muane, ke natirona’, na iatu to matessek ke’de’ anna bendan bang.

⁹Iatu mai arung natoreimo ma’kada sia untampunmo pudukna;

¹⁰iatu gamara to la’bi’ tang dirangimo sia iatu lilana la’ka’mo langngan langi’-langi’na;

¹¹iake narangimi tau tu kadangku, natendengna’ kumua maupa’, iake natirona’ tau, nasa’bu’na’ kumua to melo.

¹²Belanna kulendokan dio mai kamasussan tu to makario-rio metamba umpalaku pa’tunduan, tu pia biung sia to tae’ patunduanna,

¹³nasa’buranna’ pa’palakunna to sidi’mora namandasa, kumua angku dipamasakke sia iatu penaanna baine balu kupopela’tek-la’tek;

¹⁴umpotamangkalena’ kamaloloan, sia gau’ maloloku kupobayu lamba’ sia kupopassapu;

¹⁵napomatana’ to buta sia napolette’na to keppang;

¹⁶napoambe’na’ to kalala’ sia iatu kara-karana to tang kutandai kuparessa duka;

¹⁷kusanggang tu buangna to leko’ penaa sia kusintakki tu kandena lan mai to’ isinna.

¹⁸Kutangnga’ kumua: Situangna’ serangku la sule lako tampa rapa’ku sia urranganni alloku susito manuk-manuk penik.[1]

¹⁹Iatu uaka’ku ullambi’ uai sia ma’bongi tu ambun dio tangkeku.

²⁰Iatu kamala’birangku tontong ba’ru ussisolanna’, sia iatu panaku memba’ru lan limangku.

²¹Naperangiina’ tu mai tau sia ma’peagi, ma’pakappa tu tau umperangii tu pa’pakilalangku.

²²Iake mangkamo’ ma’kada, moi misa’ tau tae’mo umbuang kada, sia iatu kadangku tontong to’do lako tau iato.

²³Napeagina’ tau susito ungkamali’ uran sia umpopenganga sadangna susito ungkamali’ uran tampak.

²⁴Iake metaana’ lako, tanggan napatongan, apa iatu arrang lindoku, tae’ nakullei umpamalillinni.

²⁵Iake naalai penaangku male untollongi unno’ko’na’ dio to’ inan melo, unnisungna’ susi misa’ datu dio lu to’ to buda, susi misa’ to umpakatana to mario-rio.