Read Toraja-Sa'dan AYUB 3 Bible Online

AYUB 3 - Toraja-Sa'dan bible

AYUB 3

¹Mangkato umpatiku’bi’mi pudukna tu Ayub anna tampakki ropu tu allo kadadianna.

²Naparandukmi tu Ayub ma’kada nakua:

³La sabu’ tu allo kunii dadi; iatu bongi, tu ma’kada nakua: Mangkamo didadian tu misa’ pia muane.

⁴Kenna pittukora tu allo iato, da Napekutananni Puang Matua dao masuanggana tu iannato, da naarrangi masiangna.

⁵Kenna poapa ori kamalillinan sia kapittukan tu allo iato, kenna situtu’iori salebu’ makamban, anna patirambanni bosinna allo.

⁶Bongi iato la naputtai kamapittukan, da naparannu dio lu mintu’ allo lan sangtaun, da nasangbilangan mintu’ bulan.

⁷Kenna tamanangora tu bongi iato; da naden arrak kaparannuan lan.

⁸Kenna tampakkiori ropu to ma’tampak ropu allo, sia to manarang umpatiakka’ Lewiatan.

⁹La dipamalillin tu mai bintoen, ke tilalekki masiangna tu allo iato; la napeagi bang tu masiang, apa da nasae, da natiroi tu bulu mata katilalekanna masiang,

¹⁰belanna tae’ natutu’i tu ba’ba pa’tambukanna indo’ku sia tae’ nabunii dio pentiroku tu kamasussan.

¹¹Ma’apai natae’ kumate tongku dadi, anna tae’ naka’tu tu sunga’ku tonna tibussananna’ indo’ku?

¹²Ma’apai napeagina’ pangrian, ma’apai napeagina’ susu, angku ma’din ma’susu?

¹³Ianna susito la mamma’na sia ma’pakari’pina’, sia la matindona’, angku rapa’

¹⁴sisola tu mai datu sia pa’bisaranna tondok, tu umpabendanan kalena sule apa daun lauan,

¹⁵ba’tu sisola tu mai arung, tu sugi’ bulaan, tu umpangannai salaka banuanna.

¹⁶Ba’tu ma’apai anna tae’ angku dadi mangura, tu ditanan, susitu pia’-pia’ tu tang untiropa masiang?

¹⁷Dio tu nanii to tang mekaaluk untorroi kamarukkan, inde to nanii melayo tu to tang mabukumo.

¹⁸Indeto nanii rapa’ tu toditarungku, tae’ narangii tu gamaranna pangarak.

¹⁹Tobitti’ sia tokapua pada bang sia dio, sia iatu kaunan to makakamo dio mai puangna.

²⁰Ma’apai Napatiroanni masiang tu to mandasa, sia katuoan lako tu to rosso tongan penaanna?

²¹Tau iato umpeagi bang kamatean, apa tae’ nasae, nabo’bok tongan losong na iatu ianan membuni.

²²Parannu-rannu tongan sae lako unnarrak-arrak, ke nakabu’tui tu lamunan.

²³(Ma’apai Napatiroan masiang) misa’ tau, tu kabunian lalanna, sia iatu Nalontok Puang Matua mintu’ lalanna tu la naola ullendokan kalena?

²⁴Belanna dipasondana rotingku tu pekaindo’ku, sia iatu sarroku tibarrak susito uai.

²⁵Belanna iatu apa kukataku’, iamo urrampoina’, sia iatu apa kukagiang, iamo urruana’.

²⁶Tae’ kumanaman, tae’ kumari’pi, sia tae’ duka kurapa’, sangadinna narampoina’ karanggangan.