Read Toraja-Sa'dan AYUB 30 Bible Online

AYUB 30 - Toraja-Sa'dan bible

AYUB 30

¹Apa totemo napetaaina’, minda tu mangura na aku, na iatu ambe’na kusanga tang sipatu kusua male sola tu asu ullaai tuntunan domba sia bembe’ku.

²Moi kuporai, apara gai’na lako kaleku tu kamawatangan limanna? Iatu sumanga’na sia kamatotoranna tau iato moro’mo,

³iamotu to tang pa’bela napobua’ kapu’duran sia katangdiaran, namale ungkeke’i tu apa dao lu padang rangke, sia kayu anakna padang aak sia padang pangallaran;

⁴naala tu sorang mapi’da dio mai garonto’na sia uaka’ roten[2] napokande.

⁵Diali’ tu tau iato dio mai pa’tondokan, napetamban tau susito unnula’ to boko.

⁶Diparuku umpa’tondokki lombok megiangan, sia pamombong sia lo’ko’ batu;

⁷unnorron dio lu to’ kayu anak, sisi’pin bang diong to’ lelating,

⁸baga, ondongpi to tang dibilang, tu dilolai lan mai tondok.

⁹Apa totemo butungna’ naposinggiran bang sia aku tu napoulelean tang kebattuan.

¹⁰Nakagi’gi’na’ tau iato sia untoyangan kalena dio mai kaleku, sia tang masiri’ untittudui tu lindoku;

¹¹belanna Puang umbukai tu ulang tendaku sia ullullu’ lu rokkona’ sia iatu tau iato mai napalulako kaleku tu gau’na susi to urrampanan sanga’.

¹²Dio kanan nanii bendan ma’misa tu to bulituk, nasuale tu lentekku sia natungangngaranna’ tu lalan kamandasanna;

¹³natuan-tuan tu mai lalanku, sia napakerangngan tu kasangganganku, tu ia kalena tae’ to patunduanna.

¹⁴Matira’ rampo susi to untarru’ tembo’ panglo’po’ kapua, dio lu alla’na tembo’ rondon nanii sae situru’-turu’.

¹⁵Iatu apa ma’patiramban nabolloina’; iatu kamala’birangku pa’de disapui susito angin; sia iatu kamauparangku tileak susito salebu’.

¹⁶Apa totemo bonnong tu penaangku lan ba’tengku, sia allo kamandasan urrampoina’.

¹⁷Iake bongi susito dilo’po’ tu bukungku, sia tangtorena’ nakeke’ tu kamapa’diran.

¹⁸Iatu kuli’ku lono-lono napobua’ kuasa masa’ga’, mendoke’ dio lu kaleku susito tamangkale lanku lu.

¹⁹Napembuanganna’ Puang rokko to’ losso’, angku susi barra’-barra’ sia au.

²⁰Metambana’ lako Kalemi umpalaku pa’tunduan, apa tae’ Mipebaliina’; bendanna’ dio, apa tae’ Mipalanna’ penaa.

²¹Membali to tang mamasemo-Komi lako kaleku, Mieana’ lima ma- watangMi;

²²Mipalanna’ angin anna male umpettiaranna’, sia Mipasabu’ina’ angin bara’.

²³Ondongpi kuissan, kumua Puang ussolanna’ lako kamatean, lako to’ inan kasirampunanna mintu’ apa kepenaa.

²⁴Tonganna, tae’raka nala umpendondongan limanna tu tau lako to tobang, ke tae’i tu pa’tunduanna lan kamandasanna?

²⁵Tang mangkamora’ka untangi’i to narampoi allo kamaparrisan? Tae’raka kupomasussai tu diona to kalala’?

²⁶Kupeagi bang tu kameloan, apa kakadakeanora rampo; untayanna’ masiang, apa malillin sae.

²⁷Iatu ara’ku lan susito uai re’de sia tae’ narapa’ len, iatu allo kamandasan narampoimo’.

²⁸Mario-riona’ lan kalingkangku, tu tang naarrang allo, bendanna’ lan kombongan metamba umpalaku pa’tunduan.

²⁹Naposiulu’na’ serigala, sia naposolana’ burung unta.

³⁰Malotong tu kuli’ku sia tilalek dio mai kaleku, dukku tu bukungku napobua’ kamalassuan kale;

³¹iatu oni katapingku mendadi batingmo, iatu oni sulingku mendadi katumangiran mapai’.