Read Toraja-Sa'dan AYUB 31 Bible Online

AYUB 31 - Toraja-Sa'dan bible

AYUB 31

¹Siallu’mo matangku, umbara kukua umpenniroi misa’ anak dara?

²Belanna apara tu taa Napamanassa Puang Matua dao mai madaona, sia taa mana’ Nalampak To umpoissan angge maritik dao mai masuanggana?

³Tangiaraka kasanggangan tu taana to leko’ sia tangiaraka kamandasan tu taana to umpogau’ kakelokan?

⁴Tae’raka Napenunui Puang tu lalanku sia tae’raka Naia’i tu mintu’ tengkaku?

⁵Iangku kamorang-morang len ba’tu matira’ tu lentekku umpogau’ pa’pakena,

⁶la Natimbangna’ Puang dio timbangan tongan, manassa Naaku Puang Matua, kumua tae’ angku sala.

⁷Ianna sumepang tu tengkaku dio mai lalan tongan, sia iatu penaangku unturu’ kamailuanna matangku, sia iake denni kadisayuan le’ke’ dio limangku,

⁸elo’namo na iatu apa kuambo’ nakande to senga’, na iatu apa dipabu’tuanna’, elo’namo nadilampi’i situang uaka’!

⁹Iangku turu’ pa’naran penaangku lako misa’ baine, sia kuodo’ dio to’ ba’bana solaku,

¹⁰elo’namo na to senga’ napa’lambukan baineku, sia elo’namo na to senga’ urraka’i.

¹¹Belanna iatu iannato penggauran mesirisan, ondongpi misa’ kakelokan sipatu naukung to ma’paolai salu.

¹²Manassa iatu iannato susito misa’ api ma’kande pura sae lako sanggangna sia ulletta’i tu bura ra’ta’ku.

¹³Iangku tang umbilangi katongananna kaunanku muane sia kaunanku baine, ke sisalana’ tu tau iato,

¹⁴apa tu sipatu la kupogau’, ke tunannangi tu Puang Matua ma’penniro sia iake ma’paressal, apa tu sipatu la kupebalian lako?

¹⁵Iatu Puang umpadadina’ lan pa’tambukanna indo’ku, tang Napadadi dukaraka tu tau iato? Tang Misa’raka tu to ungkombongki’ lan pa’tambukanna indo’ta?

¹⁶Iangku tang umpasiolai len palakunna to bitti’ sia umpabussu mata baine balu,

¹⁷ba’tu ussuak misa kandeku, anna tae’ nakandei pia biung pira

¹⁸— ondong pissan tempon mangurangku kupelobo’i, susina’ to misa’ ambe’ sia tempon dio mai’ pa’tambukanna indo’ku kunii ungkaduttu’i tu pia baine biung —

¹⁹ianna den len misa’ to salamba salao kutiro tang ma’tamangkale sia misa’ to mase-mase tang mennammu’;

²⁰ianna tae’ napassakkena’ aakna sia tae’ napemalassui bulu dombaku tu kalena,

²¹iangku pata’pai lenni lima tu pia biung, belanna kutiro tu to untunduina’ lan babangan,

²²iake susito, elo’namo natantang tu palempengku dio mai lesokanna sia le’to tu buku lampa takia’ku.

²³Belanna napatirambanna’ tu kamandasan Napamanassa Puang Matua; sia tete dio kapasareongananNa angku tang ungkullei umpogau’ misa’ apa.

²⁴Ianna bulaan kurannuan, sia ma’kadana’ lako bulaan tasak, kukua: Iko tu sanderangku;

²⁵iangku parannumo, belanna makambanmo tu iananku sia iatu bura rangka’ku kuposugi’ lallangmo;

²⁶iangku penunumo mata allo, ke parrangmi, sia iatu bulan, ke lumilingi nakabu’ kamala’biran,

²⁷naurungan iatu penaangku dinaran buni, sia limangku unnudung pudukku,

²⁸manassa iatu iannato misa’ duka kakelokan, sipatu naukung to ma’paolai salu, belanna kupeonganni tu Puang Matua dao masuanggana.

²⁹Iangku parannu diona kamandasanna to ungkabiri’na’ sia mela’tek ke narampoi kamatilakan,

³⁰— tonganna tae’ kueloranni tu pudukku kasalan, belanna kugatai kumua namate —

³¹iannato kusisolan lan tenda tang ussa’biina’, kumua: Mindara tang dipedia’i duku’na?

³²— moi misa’ to tama sae tae’ ma’bongi dio salian, iatu ba’baku kubungkaran to lumio’ —

³³iangku samboi tu kapatodo-tintingangku susi Adam, belanna kubuni tu salaku lan ara’ku,

³⁴belanna ungkataku’na’ to buda, sia napatirambanna’ kadipamatunan dio mai to ma’rapu, kuurungan ma’pakappa sia tang tassu’ lan mai ba’ba!

³⁵A’a, kenna den siamo misa’ tau umperangiina’! Tiromi inde sia tu tanda bate limangku-dennoupa’ Napebaliina’ To umpoissan angge maritik, sia ia duka tu sura’ tu nasura’ balingku.

³⁶Manassa iatu iannato la kupadao palempengku, sia kupomakota dao ulungku.

³⁷Iatu mintu’ tengkaku la kupoissan dio oloNa Puang, la kureke’ tu Puang butung misa’ datu.

³⁸Ianna sarroina’ pa’pa’lakangku sia sitangiran tu mai kalo’na;

³⁹iangku peburai anna tae’ kubaya’i tu to sumaro sia kupamapa’di’ penaa tu puangna,

⁴⁰iake susito, elo’namo naduri tuo ussonda gandung, sia sirope ussonda dalle sisikan. Upu’mo tu kadanna Ayub.