Read Toraja-Sa'dan AYUB 32 Bible Online

AYUB 32 - Toraja-Sa'dan bible

AYUB 32

¹Attu iato natorroimi te tau sola tallu umpebalii Ayub, belanna malolo dio passanganna.

²Re’dekmi ara’na Elihu, anakna Barakheel, to Bus, to bu’tu dio mai tongkonan Ram; re’dek ara’na lako Ayub, belanna nasanga Ayub malolo tu kalena dio oloNa Puang Matua,

³sia re’dek duka ara’na lako sangmanena sola tallu, belanna tang naissan umpebalii Ayub, namoi susito nakua manassa sala tu Ayub.

⁴Apa ma’peagi tu Elihu la napa’kadai Ayub, belanna matua ia tu tau iato mai na ia.

⁵Apa iatonna tiromi Elihu, kumua iatu tau tallu tae’mo natiku’bi’ pudukna mebali, re’dekmi tu ara’na.

⁶Ma’kadami tu Elihu, anakna Barakheel, to Bus, nakua: Mangurapa’ aku na iatu kamu matessekmokomi; iamoto angku matangka sia mataku’ umpokadangkomi apa tu kutandai.

⁷Kutangnga’ kumua: Melo ke to matua induk tu ma’kada, sia to banu’ karurungan umpa’peissananni tu kakinaan.

⁸Manassa kumua iatu penaa lan ba’tengna ma’rupa tau sia penaanna To umpoissan angge maritik, tu umbenni kapaissanan lako tau iato mai.

⁹Tae’ra natomatessek tu unnampui kakinaan, sia tae’ra natomatua ulu tu untandai apa malolo.

¹⁰Iamoto kuma’kada kukua: Tanannina’ talinga, angku pokada dukai tu apa kutandai.

¹¹Tonganna, kupeagi tu buangan kadammi, kuperangii tongan tu pa’tangarammi, sae lako mitanga’tanga’ meloi tu apa dipokada.

¹²Kupalan penaamokomi, apa manassa moi misa’komi tae’ ussau’ kada Ayub, moi misa’komi tae’ umpebalii tu uleleanna.

¹³Da’mo mima’kada kumua: Kamimo tu unnappa’ kakinaan; sangadi Puang Matua, moi misa’ tolino tae’ nakulle untalo kadai.

¹⁴Iatu aku moi misa’ kada tae’pa nasa’buranna’, na iatu uleleammi tae’ angku pebalii.

¹⁵Bendan bangmo kanunu-nunu, sia tae’mo namebali len; tang naissanmo ma’kada;

¹⁶ma’peagi bangna’, belanna tae’mo nama’kada tu tau iato, belanna bendan dio anna tang naissanmo mebali.

¹⁷Totemo aku dukamo tu nalambi’ la mebali, aku dukamo tu la umpa’peissananni tu apa kutandai.

¹⁸Belanna nakabu’mo’ tu kada, sia iatu penaa lan ba’tengku umpatiakka’na’;

¹⁹manassa iatu ba’tengku susimoto uai anggoro re’de-re’de lempan; susito kiriba’ ba’ru la tesse.

²⁰La ma’kadana’, anna masorok tu ara’ku, sia umpatiku’bi’na’ randan pudukku la mebali.

²¹Moi misa’ tau tae’ kupelindoi, sia moi misa’ tau tae’ kutendengi,

²²belanna iatu pa’tendeng tae’ kupobiasai, iake susito, na Totumampakumora umputtaina’ madomi’.