Read Toraja-Sa'dan AYUB 33 Bible Online

AYUB 33 - Toraja-Sa'dan bible

AYUB 33

¹Totemo, e Ayub, perangii tu uleleangku, sia tananni talinga tu mintu’ kadangku.

²Manassa, umpatiku’bi’mo’ randan dipudukku, ma’kadamo tu tongka’ dililaku.

³Iatu kadangku umpamanassai tu penaa bulo lollong, sia iatu apa dio randan dipudukku, malambu’ tu nasa’bu’.

⁴PenaanNa Puang Matua tu umpadadina’ sia penaa ma’pamurru’Na To umpoissan angge maritik umpatuona’.

⁵Iake mikullei, pebaliimo’, sakka’mokomi umbalina’ sia tunannangmokomi.

⁶Manassa, iake dio oloNa Puang Matua, samaki’, aku duka ditampana’ dio mai losso’ pitti’.

⁷Iamoto da mipotirambanni tu diona aku, iatu pa’temme’ku tae’ nala magasa lako kalemi.

⁸Apa iatu pa’perangingku mangkamo mipokada, sia iatu gamarammi kurangimo mikua:

⁹Maserona’ aku, tae’ kapatodo-tintingangku, malinona’ sia tae’ kakelokangku;

¹⁰manassa Puang untandai apa bannangna Nanii umpoualina’, Nasangana’ susito ualinNa;

¹¹Napatama sangkala tu lette’ku, sia Napenunu tu mintu’ lalanku.

¹²Manassa tae’ mitongan tu dionato, susimo pebalingku to lako kalemi, belanna iatu Puang Matua mandu mala’bi’ namisa’ tolino.

¹³Ma’apai ammi sigaga Puang Matua, anna moi misa’ penggauranNa tae’ Nasondai.

¹⁴Belanna sanguluan ba’tu duang uluan tu lalan Napake Puang Matua ma’kada, apa tae’ napalan penaai tolino.

¹⁵Iamotu lan misa’ pangimpi, sia lan misa’ patiro mendeata kebongi, ke narampoimi mamma’ kalupi-lupian tu tolino, ke mamma’i dao patindoanna —

¹⁶attu iato Napalidan Puang tu talinganna ma’rupa tau, sia Naca’ tu pa’pakilala Naparampo lako tau iato,

¹⁷la umpatibalikki tu ma’rupa tau dio mai penggauranna, sia la umpatoyangi tu tolino dio mai kamatampoanna,

¹⁸la urrampanan deatanna diong mai panglamunan, sia iatu sunga’na da naka’tu kandean doke.

¹⁹Iatu tolino dipakilala duka diona kamapa’diran dao patindoanna, anna tontong sirari tu kamapa’diran lan buku lampana;

²⁰attu iato nakagi’gi’ ba’tengna tu kande, sia nakagi’gi’ penaanna tu kande biasa nakaduangi.

²¹Iatu duku’na tikkurrungmo, tae’mo natiroi tau, iatu bukunna, dolona tang mempaan, totemo sisumbamban-bambanmo ditiro,

²²naurungan iatu deatanna mengkareke’mo lako panglamunan sia iatu sunga’na ma’palulakomo kuasa ma’pamate.

²³Iake den misa’ malaeka’ bendan untundui, iamotu misa’ pa’bisara, misa’ lan sangsa’bu, la umpamanassai lako misa’ tau tu apa sipatu la napogau’,

²⁴manassa la Nakamasei Puang sia la ma’kada Nakua: Rampananni, kumua da nalurokko panglamunan, Kuappa’mo tu pangla’bak.

²⁵Mandu manaman tu kalena na iatonna mangura, mentomalolle’omo sule.

²⁶Massambayang langngnan Puang Matua, anNa paiman untarimai, naurungan silindo Puang situang kamela’tekan, anNa Puang umbenni sule tu kamaloloanna tolino.

²⁷Pakalan napa’perangiammi lako tolino tu penanianna sia ma’kada nakua: Mangkamo’ kasalan sia umpakelok salunna, apa tae’ angku dipabala’i.

²⁸Mangkamo tu Puang urrampanan sunga’ku dio mai lalan lu lako panglamunan, anna paiman tu deatangku untiro masiang.

²⁹Manassa inde sia tu mintu’ apa napogau’ Puang Matua lako tolino, penduan ba’tu pentallun,

³⁰iamotu umpasule deatanna tau dio mai panglamunan, naurungan naarrangi arrang katuoan.

³¹Palan penaai te, e Ayub, sia perangiina’; ma’pakappakomi, angku ma’kada.

³²Iake den misa’ apa mipokada, pebaliina’; ma’kadamokomi, belanna morai siana’ untonganangkomi.

³³Apa iake tae’, ma’perangimokomi lako kaleku; kappakomi angku ada’ikomi kakinaan.