Read Toraja-Sa'dan AYUB 35 Bible Online

AYUB 35 - Toraja-Sa'dan bible

AYUB 35

¹Ma’kada pole’mi tu Elihu nakua:

²Misangaraka malolo tu iannato, sia mikua kumua iamote tu kamaloloangku dio oloNa Puang Matua,

³tu ma’kadakomi mikua: Apara gai’na lako kaleku, ke maserona’ dio mai kasalan? Apara tu losong kupomaupa’ na iake kasalanna’?

⁴La kupebaliimokomi sia lako duka tu mai sangmanemi, kumua:

⁵Mentingarakomi langngan langi’ sia tiroi, penunukomi salebu’ langngan daomi lu;

⁶iake kasalangkomi, apara tu mipalaoan Puang? Moi anna manimpa’ kapatodo-tintingammi, apara tu mipogauran Puang?

⁷Iake malolokomi, apara tu mipennoloan lako Puang? Ba’tu apara tu ma’din Natarima Puang diong mai pala’mi?

⁸Iatu katang mekaalukammi tolino manna narua susi kamu, sia kamaloloammi umpamaupa’ ma’rupa tau.

⁹Moi anna sumarro tu tolino diona kabudanna pa’pakario-rio sia metamba umpalaku pa’tunduan napobua’ kamasa’garanna to paa,

¹⁰apa tae’ nama’kada tu tau, kumua: Umbamira tu Puang Matua, tu To Tumampaku, tu umpopenanikan ke bongi;

¹¹tu mandu umpamanarangki’ na iatu olo’-olo’ dao kuli’na padang sia ungkamaseiki’ kakinaan losong na mintu’ manuk-manuk dao langi’?

¹²Pakalan nametamba-tamba tu tau, apa tae’ Namebali tu Puang, natumang kamatampoanna to kadake.

¹³Tonganna tang Naperangii Puang Matua tu petamba punala bang, sia tang Nasaile To umpoissan angge maritik tu iannato.

¹⁴Ondong pole’, ke ma’kadakomi, kumua tae’ mitiroI tu Puang, sia iatu kara-kara dio oloNa, apa sipatu mikampai tu Puang.

¹⁵Apa belanna iatu kare’dekan ara’Na Puang tae’ narampoi tu tau sia susito tae’ Napalan tarru’i penaanna tu kapatodo-tintingan,

¹⁶iamoto nama’kada layuk tu Ayub umpokada kada tang kebattuan sia ma’kada tang paissan umpebudai kadanna.