Read Toraja-Sa'dan AYUB 37 Bible Online

AYUB 37 - Toraja-Sa'dan bible

AYUB 37

¹Tonganna, iamorato tu napoma’rundede penaangku, sia lumo’dok diong mai to’ inanna.

²Perangii, perangii tu gumaluntu’na gamaranNa, iamotu guntu’ tassu’ lan mai sadangNa.

³Narampanan tu iannato diong nasambo langi’ sia kila’ mellepa’na lako randan langi’.

⁴Gumalugu tu gamaranNa dio boko’Na, Napagumaluntu’ tu gamara kamala’biranNa, sia tae’ Napadapai, ke unnonimi tu gamaranNa.

⁵Napagumaluntu’ kalle-kallean Puang Matua tu gamaranNa; Napogau’ tu penggauran tarompo’, sia tang talambi’;

⁶belanna ma’kada lako ambun makko Nakua: Tobangko rokko lino, sia lako angin bara’ sia uran kamban Nakua: bara’komi!

⁷Naca’ tu limanna mintu’ tolino, kumua anna mintu’ tolino, tu panampaNa Puang, untandai tu iannato.

⁸Iatu olo’-olo’ male tama pentiongananna sia umbambangan kalena lan lo’ko’na.

⁹Iatu angin bara’ tassu’ lan mai pangrampunanna, sia kamadinginan lan mai pa’palumpunanna.

¹⁰Diona penaanNa Puang Matua Napadadi uai makko, iatu marantena uai susito pa’kombong dipati’no’.

¹¹Napatamai duka uai Puang tu salebu’, namagasa, Napatitale’ tu salebu’Na, nanii palepa’,

¹²anna mellepa’ male tiku lao unturu’ parentaNa, la umpalanda’i tu mintu’ apa Napa’pesuan dao lipu daenan;

¹³napoukungan padangNa, sia la Napakitan duka kamasokananNa, anNa papatui patunna.

¹⁴E Ayub, tananni talinga tu iannate, bendanmokomi, ammi palan penaai tu tanda kalle-kalleanNa Puang Matua.

¹⁵Mitandairaka, umba Nakua tu Puang Matua umpasanni, sia umba Nakua umpaparrangi tu arrang salebu’Na?

¹⁶Mitandairaka sidi’ umba nakua tikembongna gaun, tu panggaraga memangnganna To sundun kapais- sananNa,

¹⁷kamu tu to nananang allo pakeammi, ke rammanni tu kuli’na padang napobua’ kamalassuan dio mai rampe lo’nalu?

¹⁸Ma’dinrokomika susi Puang umpalumbangi tu mai gaun, anna dadi langi’ maka’da’ susito misa’ sammin dipati’no’?

¹⁹Pokadangkanni apara tu la kipokada lako Puang, belanna tae’ kima’din ussa’bu’ misa’ apa, diona kamalillinanta.

²⁰La dipokadanoraka Puang, ke la ma’kadana’? Dennoraka misa’ tau ma’kada kumua la morai disabu’i’?

²¹Den natang ditiro tu arrang, napamalillin gaun, nadenno anna sumarruk tu angin lendu’ umpamasero langi’.

²²Daa mai rampe daanna lu nanii bu’tu tu arrang bulaan; iatu Puang Matua naputu’ kamala’biran dikabangnga’.

²³Iatu Puang umpoissan angge maritik tu tae’ tatandai, kapua kamatotoranNa sia kamalamburanNa; tu liu kamaloloanNa, tang umpakelok malolona.

²⁴Iamoto Nakataku’i ma’rupa tau tu Puang, apa iatu to tang ma’perangi moi misa’ tae’ Natiroi Puang.