Read Toraja-Sa'dan AYUB 38 Bible Online

AYUB 38 - Toraja-Sa'dan bible

AYUB 38

¹Napebaliimi PUANG tu Ayub lan mai angin bara’ sia ma’kada Nakua:

²Mindara tu umpamalillinni tu pangra’ta’ tanan penaanNa Puang ma’kada tang ma’battuan?

³Pa’bakkanni tu aakmu susito misa’ muane, angKu kutanaiko, ammu pamanassanNa’.

⁴Umbara munii tongKu parandanganni te lino? Pokadaikae, ke denni inaammu!

⁵Mindara umpamanassai suka’na’? Inang muissan tu iannato! Ba’tu mindara tu unne’teranni ulang pesuka’?

⁶Umbara nalambi’ tu lentongna tonna diparokko, ba’tu mindara unnotonni tu batu petaunna,

⁷tonna siarrakan tu mintu’ bintoen melambi’, sia mintu’ anak Puang Matua siangngaran?

⁸Mindara untutu’i ba’ba tu tasik, tonna mariak tassu’ lan mai pa’tambukan? —

⁹tongKu padadi tu salebu’ la napopake sia kapittukan la napopebimbin;

¹⁰tongKu popa’lekko-lekkoi tu angge Kupamanassanni, sia Kupalakoi salliran sia ba’ba;

¹¹tongKu ma’kada Kukua: Rampo indemokote sia da mulendu’i, indemote tu nanii torro tu sumopana bombangmu!

¹²Denmoraka mupasan melambi’ temponmu tuo, sia umpadulluan inan tilalekna masiang,

¹³la ungkaka’ mintu’ randan langi’, naurungan dita’pii lan mai tu to tang mekaaluk?

¹⁴Membalimo tu lino susi pitti’ dinii umpalakoi peca’, iatu mintu’ apa ditiromo susito ma’pakean.

¹⁵Attu iato iatu to tang mekaaluk dialaimo arrangna, sia iatu lima tiangka’ dile’tomo.

¹⁶Mulambi’raka rokko tu mata kalimbuangna tasik, sia muolairaka lendu’ tu mandalanna tasik, tu dibunian tolino?

¹⁷Dipasombomoraka lako kalemu tu babangan lino tomate, sia mutiromoraka tu babangan lino lillinan parrak?

¹⁸Iatu paissanmu la nalambi’raka lako tu kalua’na kuli’na padang? Pokadaikae, ke muissan nasangi tu mintu’na te!

¹⁹Umbara nii tu lalan lako to’ inanna masiang, na iatu kapittukan umbara nanii torro,

²⁰muurunganni ma’din umbaai lako to’ lili’na, sia untandai tu lalan lu lako banuanna?

²¹Inang la mutandai, belanna attu iato munii dadi sia makambanmo tu bilangan allo katuoammu.

²²Mulambi’moraka tu bilik pangrampunanna ambun makko? Sia mutiromoraka tu bilik pangrampunanna uran batu,

²³tu Kunannanmo attunna kapussakan, sia allona kasirarian na tananan ra’?

²⁴Umbara nanii tu lalan lu lako inan nanii arrang titale’, tu nanii angin lu dio mai rampe matallo sisarak-sarak dao kuli’na padang?

²⁵Mindara ungkalii tu kalo’na uran kamban sia unggaragan lalan lila kila’,

²⁶la umpasaean uran padang tang dipa’tondokki sia padang aak tu tang natorroi tau,

²⁷la umpemalompoi padang pangallaran sia padang lo’bang sia umpatiballa’ lolona apa mentaruk?

²⁸Denraka uran keambe’? Ba’tu mindara undadian to’dona damo’?

²⁹Mindara pa’tambukan nanii tassu’ tu uai makko, sia ambun dao mai langi’ mindara undadianni?

³⁰Memmakkomo tu uai susito batu, sia sikandemo tu mai baba tasik mandalan.

³¹Ma’dinrokoka unnarra’i peporinna bintoen Bunga’, ba’tu ungko’ka’i tu pungona bintoen Orion?

³²Ma’dinrokoka umpadellekki tu mai rupanna bintoen Sodiak sia ullalanan bintoen Ursa sola anakna?

³³Mutandairaka tu apa dipondok dao langi’, sia mupamanassaraka tu parentana dao kuli’na padang?

³⁴Ma’dinrokoka umpekapuai gamarammu sae langngan gaun, anna sae tu uran kamban ussamboiko?

³⁵Ma’dinrokoka ussua kila’, anna male sia ma’kada lako kalemu nakua: Inde siakan?

³⁶Mindara umpatorroi kakinaan tu salebu’ malillin, ba’tu mindaraka umbenni patiro penaa tu ma’rupa-rupa ma’lodokna salebu’?

³⁷Mindara tu umbilang salebu’ situang kakinaan, sia umbalittua’ bussona langi’,

³⁸ke maka’dangi tu barra’-barra’ anna susito logan dipati’no’, sia pada sikandeppe’ losso’ ma’lemong?