Read Toraja-Sa'dan AYUB 4 Bible Online

AYUB 4 - Toraja-Sa'dan bible

AYUB 4

¹Attu iato umbungka’mi kada tu Elifas, to Téman, nakua:

²La masussaraka tu penaammu, ke natobai tau umpokada sangbuku kada lako kalemu? Mindara ma’din unnattai tang ma’kada-kada?

³Manassa budamo tau muada’i, sia lima langga’ mupamatoto’.

⁴Iatu kadammu unnendekammo to tilende’, sia umpabatta’ guntu’ ma’parondona tau.

⁵Apa totemo narampoimoko tu iannato, anna buyu’ tu penaammu, naruako tu iannato, anna pussak tu penaammu.

⁶Tangiaraka kamekaalukammu tu mupopentionganan, sia tae’raka murannuanni tu gau’ tang sayuammu?

⁷Mengkilala meloko, kumua mindamora tu disabu’i, ke tae’i nasala, sia umbamora nanii sanggang tu to malolo?

⁸Iatu mangkanna kutiro: Minda-minda tu untengko kakadakean, sia unnambo’ kamasussan lako to senga’, iamo la umpeparei.

⁹Tete dio penaanNa Puang Matua anna sanggang tu tau iato, sia tete dio pamurru’ illongNa anNa sabu’i.

¹⁰Umburrung tu mai singa sia ma’ngaung-ngaung — iatu isi singa mangura direbong.

¹¹Iatu singa tua la mate belanna tae’mo kandena, sia iatu anak singa birang tisambo’-sambo’.

¹²Sangbuku kada membuni urampoina’, sia tialling tama talingangku tu pa’bisikna,

¹³tongku mangka untiroi tu pentiro mendeata tonna bongi, angku ma’tangnga’-tangnga’, tonna kaleppeng-leppenganna tau.

¹⁴Narampoimo’ katirambanan sia kama’parondoan, anna popa’parondoi tu mintu’ bukungku.

¹⁵Misa’ penaa sumayang ullendu’ina’ sia umpaka’ba’ mintu’ bulungku.

¹⁶Torro bendan, apa tae’ kukanassai tu pa’kaleanna. Misa’ a’gan pa’kalean bendan dio pentiroku, sia kurangi tu gamara ma’bisik, nakua:

¹⁷Umba la nakua dadi misa’ ma’rupa tau malambu’ dio oloNa Puang Matua, ba’tu misa’ tau masero dio oloNa Tokumombongna?

¹⁸Manassa iatu mai taunNa tae’ Nakatappa’i sia iatu mai malaeka’Na Naapparan tu kapusanna;

¹⁹ondongpi iatu to untorroi banua litak, tu diparandanganni barra’-barra’, tu to dirimpi’ susi busung anna mate.

²⁰Tau iato mai dinisak-nisak lan pangallaranna masiang na bongi, tu sanggang sae lakona anna tae’ naissanni tau.

²¹Tang dilendokanraka tu ulang tendana? Mate tu tau iato mai, natae’ kakinaanna.