Read Toraja-Sa'dan AYUB 42 Bible Online

AYUB 42 - Toraja-Sa'dan bible

AYUB 42

¹Mebalimi tu Ayub lako PUANG nakua:

²Kutandai kumua Kamu tu umpoissan angge maritik, sia moi misa’ lalan tangnga’Mi tang dipadapa len.

³Mindara ia, tu tang ma’tangnga’ melo ullullungi tu pangra’ta’ tanan penaanNa Puang? Iamoto angku mangaku, kumua tang paissanna’ ussa’bu’i tu mai apa ummangngaina’ sia tang kupebuyu’.

⁴Perangiimi totemo angKu ma’kada; la Kukutanaiko, ammu pamanassanNa’.

⁵Ia manna tu tamanna talingangku kunii urrangii tu diona Puang, apa totemo matangku kalenamo umpemaranga Puang.

⁶Iamoto kuriu’ sulei tu kadangku, angku mengkatoba’ unno’ko’ diong to’ barra’-barra’ sia to’ au.

⁷Iatonna mangkamo PUANG umpokadai lako Ayub tu mintu’ kada iato, ma’kadami tu PUANG lako Elifas, to Téman, Nakua: Iatu kare’dekan ara’Ku ma’lulu-lulu lako kalemu sia lako tu da’dua sangmanemu, belanna tae’ mususi taungKu Ayub, iatu kamu mangkamokomi umpokada tang maloloNa’.

⁸Iamoto alami pitu sapi laki sia pitu domba laki, mimale lako Ayub, taungKu, ammi penoloanni sia pemalaranni la mipopemala’ ditunu pu’pu’, anna taungKu Ayub umpassambayangangkomi, belanna ia manna tu passambayangna la naala penaangKu, angKu pobannangi, tang umparampoikomi tu apa kadake, belanna iatu kamu tae’ misusi taungKu Ayub, mangkamokomi umpokada tang maloloNa’.

⁹Malemi tu Elifas, to Téman, Bildad, to Suah sia Zofar, to Naama, napogau’i susitu mangka Napokadanni PUANG. Naalami penaanNa PUANG tu passambayangna Ayub.

¹⁰Napopembalimi PUANG tu dalle’na Ayub, tonna mangka umpassambayanganni tu sangmanena, Nakamasei PUANG tu Ayub Napopanglokkon tu mintu’ apa mangka naampui dolona.

¹¹Attu iato pantan saemi tu mai siulu’na muane sia anak daranna sia mintu’ to nasitandan dolona ungkaduakki anna kumande sola lan banuanna. Sumarromi umpa’pekitanan massengna lako Ayub, anna pakatanai tu diona mintu’ kamandasan Naparampoanni PUANG, anna pantan umbenni misa’ batu salaka sia misa’ baba’ bulaan.

¹²Napamasakkemi PUANG tu katuoan undinna Ayub losong na iatu dolona; naappa’ pole’ sangpulo a’pa’ sa’bu tu domba sola bembe’; unta annan sa’bunna, sapi sangsa’bu ayokanna, na keledai birang sangsa’bu.

¹³Dadi pole’omi tu anakna muane pitu anna baine tallu.

¹⁴Iatu pa’bunga’na nasangai Yemima, iatu ma’penduanna nasangai Kezia sia iatu ma’pentallunna nasangai Kerenhapukh.

¹⁵Lan mintu’ lili’na tondok iato tae’ tau untiro baine ballo susi anakna Ayub, napaketaa mana’ dukai ambe’na sola tu siulu’na muane.

¹⁶Undinnato tuopa tu Ayub saratu’ patangpulo taunna; natiropa tu mai anakna sia bati’na patang osso’.

¹⁷Matemi tu Ayub tonna matua indukmo banu’ karurungan.