Read Toraja-Sa'dan AYUB 5 Bible Online

AYUB 5 - Toraja-Sa'dan bible

AYUB 5

¹Metamba bangmoko — denraka tau la umpebaliiko? Sia mindara tu to masero la mupennoloi?

²Tonganna iatu kamapa’diran penaa umpamate to baga sia kapangimburuan umpamatei tu to tang paissan.

³Kutiro kalenamo, umba nakua tu to baga mennuaka’ melo, apa simpolo kutampakki ropu tu inan katorroanna.

⁴Iatu mai anakna muane sisayuran pa’tunduan, dipopellesean lan to’ babangan, natae’ tau urrampananni.

⁵Iatu to karorian napurai nakande tu pegandungna, sia moi lan to’ duri naala duka, sia to ma’rang ungkailui tu apanna.

⁶Belanna tae’ nabu’tu dio mai to’barra’-barra’ tu kamandasan, sia iatu kamaparrisan tae’ natuo dio mai padang.

⁷Apa iatu tolino dadi la unnappa’ kamasussan, susi lelatu sipettia’-tiaran kendek langngan.

⁸Apa iake aku, la umpekutananna’ Puang Matua, sia lako Puang Matua la kunii umpennoloanni tu a’gangku.

⁹Umpogau’mo penggauran kapua, tu tang dilambi’na, sia apa memangngan tu tang dikemba’ diia’.

¹⁰Umpasae uran dao kuli’na padang, sia umbolloan uai dao kapadanganna.

¹¹Umpamatande to madiongan, anna iatu to rosso penaanna unnappa’ pa’tunduan matoto’.

¹²Ia umpatangdadi tangnga’na to pakira-kira, anna tang danun tu mai pengkaranganna.

¹³Ia umpoya to matarru’ lan pa’pakenanna, anna didampa tu tanan penaanna to pakira-kira.

¹⁴Iake masiangi sumpumo lan kamalillinan, sia iake tangngai allo, sumalappa susi ke bongi.

¹⁵Apa Ia urrampananni tu to madiongan dio mai pa’dang pudukna tau iato mai, sia to makario-rio lan mai limanna to mawatang.

¹⁶Iake susito den kapa’rannuananna to bitti’ sia kakadakean untutu’ pudukna.

¹⁷Manassa maupa’ tu to Napa’dikki Puang Matua, iamoto da musayu peada’na To umpoissan angge maritik.

¹⁸Belanna Ia ma’pamapa’dik sia Ia ma’pamole, Ia ma’bamba sia limanNa ma’pamondo.

¹⁹Pennannanko lan kapussakan, anna Ia urrampananko, sia pempitu tae’ nanii urruako kakadakean.

²⁰Lan kamangeloan Ia ullendokangko dio mai kamatean, sia lan kapararian Nalendokangko dio mai kuasanna pa’dang.

²¹Karerungangko dio mai lila mataran sia tae’ mula ungkataku’ kasanggangan.

²²La mupetaai tu kasanggangan sia karorian sia tae’ mula ungkataku’i tu olo’-olo’ masuru.

²³Belanna la siallu’ko tu mai batu dio lu padang, sia sikaeloko olo’-olo’ dio lu kapadanganna.

²⁴La untiroko kamarampasanna tendamu, sia iake mutiroi tu tarampakmu, moi misa’ apa tae’ pa’de.

²⁵La untiroko kamemba’karanna tarukmu sia bati’mu susito riu dio lu padang.

²⁶La banu’ karurungangko tama batu dilobang, susito sanguyun gandung diala ke attunnami.

²⁷Manassa iatu iannate kiparessamo, tongannamo susito; perangiimi sia palanni penaa tu iannato.