Read Toraja-Sa'dan AYUB 6 Bible Online

AYUB 6 - Toraja-Sa'dan bible

AYUB 6

¹Apa mebali tu Ayub lako nakua:

²A’a, kenna ditimbang melo tu karossoan penaangku, sia kamapa’dirangku dipatorro sola lan timbangan!

³Manassa iatu magasanna losong na iatu bungin diong randan tasik; iamoto na iatu kadangku tang ma’rundunan bangmo.

⁴Belanna iatu anak pananna To umpoissan angga maritik untossokmo’, sia namimmi’ penaangku tu ipona; iatu mintu’ mepatirambanna dio mai Puang Matua ma’pampangammo ullaoina’.

⁵Mangoa’raka tu keledai lampung, ke denni riu malunanna, ba’tu unnorronraka tu sapi, ke denni kandena?

⁶Ma’dinraka nakande tau tu apa tang disiai, ba’tu mammi’raka tu mabusanna tallo’?

⁷Manokana’ untoei tu iannato, susi bang to kande kukagi’gi’.

⁸A’a, dennoupa’ nadipalanda’ siamo tu pengkamoyaku sia Napadadi Puang Matua tu apa kurannuan,

⁹dennoupa’ naalai penaanNa Puang Matua ussanggangna’, anNa e’te’i tu limanNa ungka’tu sunga’ku!

¹⁰Ke susito, iamo kupomatana, ondongpi kupoparannu sia kupolo’dok-lo’dok, lan tu kamasussan, tae’ bang Napasoro’ Puang, belanna tae’ kupeonganni lenni tu kadanNa To masero.

¹¹Apara tu kamatotorangku angku ma’dinpa ma’peagi sia apara kuanga’, angku moraipa la umpamalambe’ sunga’?

¹²Susiraka batu tu kamatotorangku sia tambagaraka tu kaleku?

¹³Tang tae’ raka pissan duka tu kaditunduiangku sia tang sumpuraka tu lalan kadirampanangku?

¹⁴Minda-minda umpadapa kamamasean dio mai sangmanena, iamo tang umpalan penaa ungkasiri’ To umpoissan angga maritik.

¹⁵Iatu mintu’ siulu’ku tang manappa’ susito salu’-salu’, susito uai saba’ ullempanni randanan;

¹⁶tu malutu napobua’ uai makko, na iatu ambun makko lollo’mo lan;

¹⁷ke attunnai mere, pa’de pissan tu uainna; ke pealloanni, marangke tu salinna.

¹⁸Ma’lekko-lekko tu mai naolanna, lu tama padang pangallaran, anna tae’mo na ditiro.

¹⁹Tu tolumio’na Tema umpalelei mata, iatu sibaanna tu mai to pallaona Syeba, urrannuanni tu iannato.

²⁰Tang dadi tu apa narannuan tau iato, napakenamo apa narannuan, tonna rampomo lako.

²¹Susi dukamokomito lako kaleku; mimane untiroi tu apa mepatiramban, ammi mataku’.

²²Denraka kuma’kada kumua: Benna’ misa’ apa? Ba’tu kukuaraka: Tunduina’ sia benna’ tu apammi angku pa’papperanni.

²³Ba’tu kukuaraka: Rampananna’ dio mai limanna to ma’pandasa? Sia kukuaraka: La’bakna’ dio mai limanna to ma’pakario-rio?

²⁴Ada’ina’, angku kappa; pokadanna’, umba kunii pusa.

²⁵Lendu’ matoto’na tu kada tongan! Apa apara battuananna tu peta’tanmi?

²⁶Denraka lan penaammi pasayu kada bang? Sia misanga bangraka angin tu apa nasa’bu’ to ka’tu rannunna?

²⁷Moi anna pia biung la mipa’lotereian duka, sia iatu sangmanemi la mipo- balukan.

²⁸Apa totemo, sulepokomi mai, dio pentiromi tae’ angku la umpokadangkomi tang tongan.

²⁹Tangnga’ meloi, da naden katangmaloloan; ondongpi la mintangnga’ tongan, iatu katonganangku tang tilento.

³⁰Denraka kakelokanna tongka’ dililaku? Tang ma’dinraka tu pa’pesa’dingku umpasisengaranni tu kamandasan?