Read Toraja-Sa'dan AYUB 7 Bible Online

AYUB 7 - Toraja-Sa'dan bible

AYUB 7

¹Tang mandu mara’ta’raka tu tolino dao kuli’na padang, tang susiraka allona tosumaro tu katuoanna?

²Susitu misa’ kaunan ungkamali’ pentionganan, ba’tu susi misa’ to sumaro umpeagii tu sarona.

³Susi dukato tu aku dipaketaa kamaparisan pirang-pirang bulan, sia dipapatuanna’ kamandasan pirang-pirang bongi.

⁴Iake malena’ mamma’ kutangnga’ kumua: Piranra kula millik? Apa malambe’ tu bongi, angku mosomo membaliang-liang sae lako tilalekna masiang.

⁵Iatu kaleku nasitutu’imo ulli’-ulli’ sia tikkurrung-kurrung tu kuli’ku, sia iatu kuli’ku massendang-sendang sia ma’nana.

⁶Kamatirasanna alloku losong anna panikuan, sia madomi’ sae lako upu’na sia tae’ tu dirannuan.

⁷Kilalai iatu katuongku sangpenaanri; sia iatu matangku tae’mo nala untiroi tu melona.

⁸Minda-minda umpata’paina’ mata, tae’mo nala untirona’; mipapatuimo’ matammi, apa ta’demo’.

⁹Susito gaun pa’demo sia sumayo-mayo male kabu’, susi duka tu minda-minda mengkalao rokko lino tomate, tae’mo nakendek sule.

¹⁰Tae’ lenmo nasule lako banuanna, sia tang natiromo tu inan katorroanna.

¹¹Apa totemo ia duka tu aku tang kupadapamo tu lilaku, sangadinna la ma’kadana’ lan kapussakan penaangku, sia la sumarrona’ lan kamapairan deatangku.

¹²Susira’ka tasik ba’tu naga tasik, amMi padenanna’ toma’kampa?

¹³Iake kutangnga’i, kumua iatu inan kamammarangku la umpakatanana’, sia iatu katindoangku umpamaringan sarroku,

¹⁴attu iato Mipatirambanna’ pangimpi sia Mipamataku’na patiro mendeata,

¹⁵naurungan kupalosongmo tu susito la dikalessek, sia kupalosongmo tu la mate na iatu kamaparrisangku.

¹⁶Namosomo’, tae’mo kula tontong tuo. Rampanammo’, belanna iatu alloku sangpenaanri.

¹⁷Apa todara ia tu tolino, amMi sangari tarompo’ tongan, Miurungan umpariba’tangi.

¹⁸AmMi paressai, ke melambi’oi, sia Misudi lan mintu attu?

¹⁹Sangapaporokomi la umpatampeina’ mata, amMi rampananna’, kuurungan ma’din unnamma’ elo’ku?

²⁰Iake kasalammo’, la kupatumbari tu Puang, To umpenunu bang tolino? Ma’apari Mipapatui bangna’ passandaMi, naurungan kupomagasamo tu kaleku?

²¹Ma’apari amMi tang umpagarri’ri tu kapatodo-tintingangku? sia ma’apari amMi tang umpa’dei tu kakelokangku? Belanna madomi’na’ sumpandan lan to’ barra’-barra’; attu iato la Midaka’na’, apa ta’demo’.