Read Toraja-Sa'dan AYUB 8 Bible Online

AYUB 8 - Toraja-Sa'dan bible

AYUB 8

¹Ma’kadami tu Bildad, to Suah nakua:

²Sangapaporoko la ma’kada susito sia mintu’ kada sun dio pudukmu butung to angin bara’?

³Ma’dinraka tu Puang Matua umpakelok salunna, ba’tu ma’dinraka To umpoissan angge maritik umpakelok kamaloloan?

⁴Umbai kasalammo tu mai anakmu lako Puang, iamoto Naparampoi poleanna tu kapatodo-tintinganna.

⁵Apa iake mudaka’i tu Puang Matua sia umpengkamoyai kamaturu-turuanna To umpoissan angge maritik,

⁶iake maseroko sia bulo lollong, manassa la tiakka’mo tu Puang untunduiko sia umpasuleko lako tampa rapa’mu sitinaya kamaloloammu.

⁷Iake susito iatu a’gan dolomu baitti’ ditiro, apa a’gan undimmu la mandu tarompo’.

⁸Belanna la mupekutanan lako to dolona sia palan penaai tu pa’tangngaranna nene’ siosso’na.

⁹Iake kita to dadi sangmai’ki’, moi misa’ apa tae’ taissan; belanna susito bayo-bayo tu allo katuoanta dao kuli’na padang.

¹⁰Tang la naada’irokoka tu tau iato sia tang la napokadanrokoka, sia la umpatassu’ kada lan mai ba’tengna?

¹¹Tuoraka tu tuyu, ke tae’i nalan to’maranona? tuoraka tu marrang, ke tang dioi to’ biring uai?

¹²Tuo melopa, tae’pa nama’din disasa’, anna ta’pa malayu dolo namane iatu mai riu senga’.

¹³Dipasusimoto tu to tang ungkilalai tu Puang Matua, sia ka’tumo tu apa narannuan to tang mekaaluk.

¹⁴Iatu mai apa narannuan susi misa’ bannang serang laa-laa, sia sanderanna butung misa’ serang laa-laa.

¹⁵Umposande’ banuanna, apa tae’ nabendan, nadammak tu iannato, apa tae’ natumanan.

¹⁶Loboran sia tang marangke tu kalena lan to’ allo mala’da’, sia iatu tangkena sipendongloran dio to’ tarampakna.

¹⁷Na iatu uaka’na siperroroan dio to’ batu, sia sikallikan lan lu alla’ to’ batu.

¹⁸Apa iake didu’dukki tu tau iato dio mai to’ inanna, napeongannimi, nakua: Tae’ bangpa kutiroko!

¹⁹Manassa susimoto tu kaparannuan katuoanna, sia tuo dio mai padang tu senga’na.

²⁰Manassa iatu Puang Matua tae’ nala ussualei tu to bulo lollong sia tae’ Nasaladanni limanna tu to kadake gau’na.

²¹Iake nalambi’i attunna tontong tu Puang la umpopetaako, sia tontong umpasila’tekan randan pudukmu.

²²Iatu to ungkabiri’ko la nakabu’ siri’, sia tendana tu to tang mekaaluk la ta’demo.