Read Toraja-Sa'dan AYUB 9 Bible Online

AYUB 9 - Toraja-Sa'dan bible

AYUB 9

¹Apa nakua Ayub mebali:

²O tonganna, inang kutandai, kumua den susito, umbara nakua tu ma’rupa tau ditonganan, ke sitingoanni Puang Matua?

³Iake morai tu Puang ussikara-karanni, lan sangsa’bu pekutana moi misa’ tae’ nakullei umpebalii.

⁴Mindara tu ma’din umbalii Puang, moi anna matumba tu kamatarrusanna sia matumba tu kakapuanna kamatotoranna, anna torro marampa’?

⁵Iamo umpalele buntu, anna tae’ tau unnissanni, Ia umbalittua’i napobua’ kare’dekan ara’Na.

⁶Ia umpatiseno kuli’na padang, anna tilele, naurungan tilento tu mai lentongna.

⁷Ia umparentai tu allo, anna tae’ nadellek sia Ia untutu’ bintoen, anNa ca’i.

⁸Ia manna misa’ umpatiballa’ langi’ sia umpopentengka lentekNa dao ma’bombangna tasik.

⁹Ia ungkombong bintoen Ursa sia bintoen Orion, tu bintoen Bunga’ sia bintoen Ma’karapu-rapu rampe Lo’na lu.

¹⁰Ia umpogau’i tu mai apa kalle-kallean, tu tang dilambi’, ondongpi tanda mangnga tang dikemba’ diia’.

¹¹Iake Naola lendu’na’, tae’ kutiroI, iake sumayo-mayoI ullendu’ina’, manassa tae’ kupemarangaI.

¹²Iake Nasintakki tu mai apa, mindara umpadapai? Mindara tu ma’kada lako Kalena nakua: Apara tu mipogau’?

¹³Iatu Puang Matua tae’ Napatananni tu kare’dekan ara’Na, diong kuasanNa nanii tukku tu patunduanna Rahab;

¹⁴ondongpi iatu aku ma’dinra’ka umpebalii Puang, sia ma’dinra’ka untonno’ kadangku umpebalii Puang.

¹⁵Moi angku tongan, tae’ kuissan umpebalii, sangandinna mengkamoyana’ umpalaku kamaturu-turuanna To ma’paolai salungku.

¹⁶Iake metambana’ sia Napebaliina’, tae’ angku patonganni, kumua Natanannina’ talinga;

¹⁷Iamo, tu ummangsannina’ tete dio angin bara’, sia umpakerangan bangkeku moi tae’ Napobannang.

¹⁸Tae’ Naeloranna’ melayo, sangadinna Napedia’ina’ kamapairan.

¹⁹Tonganna diona kamatotoran bangri — matoto’ Ia, sia diona salunna, Nama’kada tu Puang Kumua: Mindara ma’din untambaiNa’ umpebalianni?

²⁰Moi angku tongan, pudukku kalena urra’ta’i tu kasalangku, moi angku tang sala, Puang kalena umpasalana’.

²¹Tae’ salaku, tae’ kukabudai tu sunga’ku, kukagi’gi tu katuoangku, podo natonganna.

²²Mintu’na pada bangsia, iamoto kuma’kada, kukua: Pada bangsia to tang sala sia to sala Nasabu’i Puang.

²³Iake ta’pa napatei ulang pebambaNa, Napetaai Puang tu kabuyuranna to tang sala.

²⁴Iatu lino disorong tama kuasanna to tang mekaaluk sia Natampun Puang tu lindona to ma’paolai salunna; iake tangia Puang umpogau’i, minda pole’opa?

²⁵Manassa iatu alloku lendu’ matira’na na iatu pesua dipopa’dondo, tarru’ liu bang anna tae’ natiroi tu melona.

²⁶Sumayo bang susito lopi tille, susito langkan maega ussiok pealanna.

²⁷Iake kutangnga’i, kumua: La kukalupai bang tu sarroku, sia kua’ga senga’ tu rupangku sia kupaparannu tu penaangku,

²⁸manassa kukataku’ tu mintu’ kamaparrisangku; kuissan kumua iatu kamu tae’ Mibilang maserona’ dio mai kasalan.

²⁹Da’ito angku sala bangmo; ma’apai angku la unta’ka’i punala bang kaleku?

³⁰Moi angku baseimo ambun makko kaleku sia usseroimo soda limangku,

³¹manassa la Miparokkona’ to’ tombang, anna kagi’gi’na’ tamangkaleku.

³²Belanna iatu Puang tae’ angku susi, iamoto misa’ tolino, tu ma’din kupebalii, kumua: Tamale sola lako to ma’paolai salu.

³³Lala sia manii naden to unnola malolo dio alla’ta, tu ma’din umparemme’iki’ lima sola dua,

³⁴anna lendokanni Puang tu pebambaNa dio mai kaleku sia da Naparampoina’ tu mepatirambanna;

³⁵iake susito la ma’kadana’ sia tae’ angku kataku’I tu Puang, belanna tae’ tu kupobannang la mataku’.