Read Toraja-Sa'dan PA’PUDIAN 10 Bible Online

PA’PUDIAN 10 - Toraja-Sa'dan bible

PA’PUDIAN 10

¹O PUANG, apara bannangna amMi toyangra bendan, sia apara bannangna amMi membunira tonna attu kapussakan?

²Tu belanna kamatampoanna to tang mekaaluk anna pandasai tu to makario-rio, melo ke didammakki tu tau iato mai lan pakira-kiranna tu napana’ta’.

³Belanna iatu to tang mekaaluk ussattuan kalena unturu’ lalan penaanna, sia iatu to mesaro bu’tu kadake untendeng kalena sia umpa’kada solangi PUANG.

⁴Nakua tu to tang mekaaluk naturu’ a’gan matampona, kumua: Tae’ ia Namepapakkanni tu Puang; belanna iatu mai passanganna nakua: Tae’ ia Kapenomban.

⁵Mintu’ lalanna tontong bang maupa’, iatu pa’paolaimMi salu tang nalambi’ tangnga’na langngan, sia mintu’ balinna natuai.

⁶Ma’kadami lan penaanna, nakua: Tae’ angku la tibendon len, sia tae’ anna rua lenna’ kasanggangan lako osso’ sipapa’ku.

⁷Iatu sadangna ponno tampak ropu sia lando pa’du sia pa’pakario-rio, sia dio tampak lilana den kakelokan sia kakadakean.

⁸Ma’pakappa dio to’ pangaungan dio lu randan tondok, dio to’ kabunianna nanii umpatei to tang sala. Sia matanna ussinding to makario-rio.

⁹Mangaung dio to’ kabunianna butung to singa lan to’ kakayuanna; sia mangaung la undammak to dipandasa. Nadammakmi tu to dipandasa, nariu’i tama bundena.

¹⁰Kumuku umbukku kalena anna tobang tama kanuku matoto’na tu to mase-mase.

¹¹Ma’kadami lan penaanna nakua: Tang Nakilalaimo Puang Matua, Nabuni tu lindoNa, tarru’ tae’mo Natiroi.

¹²Ke’de’Komi, PUANG! O Puang Matua, angka’i tu limamMi, da Mitananni boko’ tu to dipandasa.

¹³Matumbai anna tontong bang tu to tang mekaaluk umbelle’ Puang Matua, sia nakua lan penaanna: Tae’ amMi la mepapakkanni?

¹⁴Manassa Mitiro tu iannato, belanna Mitiro tu kamaparrisan sia Karossoinaan. La Mipapakkanni lan lisu pala’Mi, lako duka Kalemi nanii umpasande’ kalena tu to mase-mase; belanna inang Kamu tu patunduanna pia biung.

¹⁵Rebongi tu takia’na to tang mekaaluk sia to kadake; papakkanni tu katangmekaalukanna satae’na Miappa’i.

¹⁶PUANGmo tu Datu tontong sae lakona. Mintu’ bangsa maipi’mo lan mai padangNa.

¹⁷O PUANG, Miperangiimo tu pa’poraianna to umpamadiongan penaanna; Kamu umpabatta’i tu penaanna sia Kamu untananni talinga,

¹⁸la umpasalunna pia biung sia to dipakario-rio, kumua iatu tolino untorroi kuli’na padang da anna ma’patiramban pole.