Read Toraja-Sa'dan PA’PUDIAN 103 Bible Online

PA’PUDIAN 103 - Toraja-Sa'dan bible

PA’PUDIAN 103

¹Pa’pudianna Daud. Pudimi tu PUANG, e sumanga’ku, sia sanga maseroNa, e mintu’na lan tondon to batangku;

²Pudimi tu PUANG, e sumanga’ku, sia da naden misa’ mukalupai tu pa’kamaseNa.

³Tu umpa’dei mintu’ salamu, sia umpamondo mintu’ sakimmu.

⁴Tu ullendokan sunga’mu diong mai lamunan, sia ummakotaiko kamasokanan sia kamamasean,

⁵Tu umpaguntu’i kameloan tu deatammu, muurunganni mellomo butung to langkan maega.

⁶Iatu PUANG umpalolang kamaloloan Sia ussanda tonganni to dipandasa.

⁷Mangka dukamo Napokada lako Musa tu mintu’ lalanNa, sia mintu’ penggauranNa Napokada lako to Israel.

⁸Iatu PUANG sumpu mamase sia sa’pala buda, kalando pesuka’ sia kapua kamasokananNa.

⁹Tae’ anNa tontong bang unggagaiki’, sia tae’ Nala tontong bang sengke.

¹⁰Tae’ anNa gau’ki’ sitinaya tu mai kasalanta, sia tae’ anNa pakkanniki’ sitinaya tu mai gau’ kadaketa.

¹¹Belanna susi sikalangka’na langi’ anna lino, susi dukamoto tu kapuana kamasokananNa lako mintu’ to ungkataku’I

¹²Pada sikambelanna matallo anna matampu’, pada duka mambelanna to Nanii Puang umpatoyangi dio mai kaleta tu salata.

¹³Susi misa’ ambe’ unnala mase anakna, susi dukamoto tu PUANG unnala mase mintu’ to ungkataku’I.

¹⁴Belanna Naissan tu garaganta, sia Nakilalai kumua kita te losso’ bangri.

¹⁵Iatu tolino susi bang riu katuoanna, sia susi bunga-bunga dio lu padang, susi dukamo ia menta’bi to.

¹⁶Ianna iri’i angin, pa’demi, naurunganni tae’mo anna peamu’i inanna.

¹⁷Apa iatu kamasokananNa PUANG tempon dio mai landa’ lako attu situran, lako mintu’ to ungkataku’I, sia iatu kamaloloanNa untaranak lanto mimi’na.

¹⁸Iamotu lako mintu’ to ungkaritutui basseNa Puang, sia to ungkanannangi tu parentaNa anna turu’i.

¹⁹Napatunannangmo PUANG tu isungan kapayunganNa lan suruga, sia iatu kadatuanNa umparenta mintu’ angge maritik.

²⁰Pudimi tu PUANG, e mintu’ malaeka’Na, e mintu’ to lalong, tu umpogau’ kadanNa. Sia umperangii kadanNa!

²¹Pudimi tu PUANG, e mintu’ pa’baraninNa, e mintu’ lentek maringanNa tu umpogau’ pa’poraianNa!

²²Pudimi tu PUANG, e mintu’ panampaNa, Dio lu mintu’ lili’ parentaNa. Pudimi tu PUANG, e sumanga’Ku!