Read Toraja-Sa'dan PA’PUDIAN 104 Bible Online

PA’PUDIAN 104 - Toraja-Sa'dan bible

PA’PUDIAN 104

¹Pudimi tu PUANG, e sumanga’ku! O PUANG, Kapenombangku, Kamumo tu ma’iringanna kapua; Kamumo tu umpobelo kakapuan sia kamala’biran.

²Kamu tu umpembungku’ arrang butung to parramba’ sia umballa’ langi’ butung to sampin tenda.

³Iamo umparandanganni lan to’ uai tu inan ma’duang papa’na, Ia umpokareta salebu’, Iamo sumalong-malong dao pani’ angin.

⁴Sia angin Naposumbungan lentek, sia api dukku Napokambutu’ maringngan.

⁵Iamo mangka unnoton lino dao parandanganna, naurunganni tae’mo nala tigega’ len sae lakona.

⁶Mangkamo Mipabungku’i tasik butung to parramba’, iatu mai uainna ungkabu’ mintu’ tanete.

⁷Belanna pa’pakarrangMi anna sore tu uai, sia belanna galugumMi tilulunmi tu uai mallai;

⁸anna kendek tu mintu’ buntu sia mere rokko tu mintu’ lombok dio inan Mipanniannamo parandanganna.

⁹Mangkamo Mikatonanni tu anggenna, tu tae’ nama’din nalendu’i, kumua da anna sule pole ungkabu’i te lino.

¹⁰Ia umpatikula’dak mata kalimbuang dio lu mintu’ lombok, tu lolong ussellak len mintu’ tanete;

¹¹Sia umpairu’ mintu’ olo’-olo’ dio lu kapadanganna, sia ia duka tu mintu’ keledai lampung umpapaya ma’rangna.

¹²Dio to’ inan sikandappi mintu’ uai iato nanii messerang manuk-manuk; anna unnoni-noni dao lu mintu’ tangke kayu.

¹³Ia ussakka’i tu mintu’ buntu dao mai inan ma’duang papa’na, anna pedia’i bua pengkarangamMi te lino.

¹⁴Napakendek tu riu napotuoi olo’-olo’, sia iatu mai tananan la naposara’ tolino, anna pabu’tui tu tobangan kollong diong mai kuli’na padang.

¹⁵Sia uai anggoro’ tu umpasende tolino, sia minnak tu umpatibangka’ rupanna, sia bo’bo’ tu umpamalapu’ penaanna tolino.

¹⁶Mintu’ kayunNa PUANG la dipedia’i, ondongpi, mintu’ kayu arasi’ dio Libanon tu mangka Natanan.

¹⁷Tu nanii manuk-manuk messerang, sia iatu tambolang lolok buangin nanii messerang.

¹⁸Mintu’ tu buntu malangka’ napopasang bembe’ lampung, sia mintu’ buntu batu nanii mello’ko’ kalinti to’ batu.

¹⁹Puang umpadadi bulan dinii untandai attu, sia ia duka tu allo umpeloloi kabotoanna.

²⁰IamMi paden malillin, bongimi, na attu iato mintu’ olo’-olo’ lan kurra manapa’ tassu’ menono’.

²¹Mintu’ anak singa unnurrung-urrung unnanga’ kandena, sia undaka’ kandena dio mai Puang Matua.

²²Ianna dellekmo allo, tibalikmi sola nasangi, anna mamma’ lan lu lo’ko’na.

²³Sunmi tu tau lako to’ pengkaranganna, sia masara’ sae lako makaroen.

²⁴Tumba ia budanna tu mintu’ penggauramMi, o PUANG! Kamumo tu mangka ungkombong nasangi to tete dio kamatarrusamMi; anna ponnoi pa’padadimMi tu lino.

²⁵Iatu tasik pada kapuana to sia maluanganna, nanii olo’-olo’ sisayoan tang dikemba’ dibilang, la bitti’na la kapuana.

²⁶Nanii sisayoan mintu’ kappala’, sia nanii Lewiatan tu mangka Mipadadi kumua amMi sipaningo.

²⁷Mintu’i massola nasang umpeagiKomi, kumua amMi tadoanni kandena, ke allu’nami.

²⁸IamMi tadoanni lako, narampunmi, sia iamMi bungka’ pala’Mi, dipedia’i nasang kameloan.

²⁹IamMi buni lindoMi, tirambanmi, sia iamMi alami tu penaanna, matemi, anna sule lako litak.

³⁰IamMi sua PenaamMi, dadi bangsiami tu mintu’na, sia Mibangla’i tu kuli’na padang.

³¹Sangapaoi anna tontong sae lakona tu kamala’biranNa PUANG, sia sangapaoi anna posendei PUANG tu panggaraganNa.

³²IanNa pata’pai mata tu lino, tiseno-senomi, ianNa tumbui tu mai buntu, merambumi.

³³La umpenanianna’ PUANG angge tuoku, sia la umpakendekanna’ pa’pudian Kapenombangku ke ten siapa’ to.

³⁴Sangapaoi anna alai penaanNa tu mintu’na lalan ba’tengku! Iate aku la parannu paimanna’ lan PUANG.

³⁵Iatu mintu’ to umparri-parri kasalan la roto’ lan mai lino, sia tappu tu mintu’ to tang mekaaluk. Pudimi tu PUANG, e sumanga’ku. Haleluya!