Read Toraja-Sa'dan PA’PUDIAN 105 Bible Online

PA’PUDIAN 105 - Toraja-Sa'dan bible

PA’PUDIAN 105

¹Pudimi tu Puang sia meongli’komi ussa’bu’ sanganNa. Pakaleleanni tu penggauranNa dio lu mintu’ bangsa!

²PenanianNi sia pakendekanNi pa’pudian; pokadai tu sininna penggauran kalle-kalleanNa!

³Massattuangkomi diona sanga maseroNa; mintu’ to undaka’ PUANG sipatu la sende batu ba’tengna.

⁴Anga’i tu PUANG sia tuntunni tu matoto’Na; la tontongkomi undaka’I ammi pellambi’i oloNa.

⁵Kilalai tu mintu’ tanda memangngan mangka Napogau’, sia mintu’ tanda kalle-kalleanNa sia mintu’ panglampakNa tu ombo’ dio randan pudukNa,

⁶e mintu’ tarukna Abraham, taunNa, e mintu’ bati’na Yakub, tu Napilei langsa’.

⁷Iatu PUANG, Iamo Kapenombanta, sia mintu’ pa’paolainNa salu lalo lan mintu’ lino.

⁸Nakilalai sia tu basseNa tontong sae lakona, iamotu kadanNa tu mangka Napepasanan landa’ lako sangsa’bu osso’na.

⁹Iamotu basse Nasibassei Abraham, sia sumpaNa lako Ishak.

¹⁰Sia iatu aluk Napondok, Naarra’ lako Yakub la napoaluk, sia lako Israel la napobasse tontong sae lakona,

¹¹tu nakua kadanNa: La Kutekkenniko tana Kanaan, mana’ diba’giangko.

¹²Iatonna tang pira tu tau iato mai, sia sidi’ tonganri sia to sae bangri lan,

¹³sia ullelei simisa’ bangsa. Sia ke’de’ dio mai parenta senga’ male umpengkara’pai bangsa senga’,

¹⁴tang Naeloran Puang tu misa’ tau la umpandasa tau iato mai, sia Napa’dikki duka tu mai datu diona tau iato mai.

¹⁵Nakua kadanna: Da mirumbui lako tu mati’ to mangka Kutokko, sia da mipogau’ kadakena lako mintu’ nabingKu!

¹⁶Ia untambai ra’pak padang sae lan tondok iato, sia Napaputta tu kande, dipopamuntu.

¹⁷Anna suai dolo tu misa’ tau lako, iamotu Yusuf tu mangka dibalukan mendadi kaunan.

¹⁸Napatamami tau tama sangkala tu lentekna, sia napaluangi rante bassi.

¹⁹Sae lako dadinna tu kadanna sia Natongannimo kadanNa PUANG.

²⁰Iatu datu ussua tau urrampananni, sia iatu pekapuanganna ba’tu pira-pira bangsa umbukai tu rante bassinna;

²¹Naangka’mi datu mendadi to paa lan tongkonan layukna, sia to umpoissan mintu’ barang apanna.

²²Kumua anna rendenni tu mintu’ to paa unturu’ lalan penaanna, sia kumua anna ada’i kakinaan tu mai pekaamberanna.

²³Saemi lako Mesir tu Israel, sia mempue tu Yakub dio padang Ham.

²⁴Napopemba’ka’ kalle-kallean tongan Puang tu taunNa, sia mandu Napamawatang anna iatu mai balinna.

²⁵Napasenga’mi Puang tu penaanna tau iato mai, naurunganni ungkabiri’i tu mai taunNa, sia natangnga’ tu mai orangNa.

²⁶Nasuami tu Musa, taunNa sia Harun to Napilei langsa’.

²⁷Napogau’mi sola duai dio lu tau iato tu mintu’ tanda kalle-kallean mangka Napokada, sia mintu’ tanda mangnga napogau’ dio lu tana Ham.

²⁸Napasaemi Puang tu malillin, naurunganni pittuk, apa tae’ anna palanni ara’na tau iato mai tu kadanNa Puang.

²⁹Napopembali rara tu uainna, anNa patei tu mintu’ balena.

³⁰Iatu tondokna Nasitutu’i tokko’, sae tama mintu’ bilikna tu mai datunna.

³¹Ma’kadami tu Puang anna sae tu tabuan lendu’ budanna, sia kasisi’ ussitutu’i lili’ padangna.

³²Napasae tu uran batu Naposondana uran, sia Napasae tu api ma’lulu-lulu lan padangna.

³³Napasiapananni tu mintu’ garonto’ anggoro’na sia kayu arana, sia Narebong-rebong tu mintu’ kayu lan mintu’ lili’na.

³⁴Ma’kadami tu Puang anna sae tu batik, sia sae tu pokkamurrung tang dikemba’-kemba’.

³⁵Tu umpepurai angganna daun kayu lan tondokna, sia ungkande mintu’ tanananna.

³⁶Sia Napatei siapa tu mintu’ anak pa’bunga’ lan padangna tau iato, tu bunga’ kamatotoranna.

³⁷AnNa solanni sun tu to Israel umpokinallo salaka sia bulaan, sia dio lu sukunna tae’i misa’ tau titodo len.

³⁸Sendemi tu to Mesir tonna sunmo tu tau iato mai, belanna narampoi kamatakuran lako tau iato mai, tu to Masir.

³⁹Naballa’ Puang tu salebu’ la unnonganni tu to Israel, na api la umpemasiangi bongi.

⁴⁰Malakumi tu tau iato mai, anNa pasaei Puang tu ba’tu sangapa puyo, sia Napedia’i roti dao mai langi’.

⁴¹Naparassak tu buntu batu anna sun tu uai, tu lolong lako padang marangke butung salu.

⁴²Belanna nakilalai tu kada maseroNa, sia iatu Abraham, taunNa.

⁴³Iamoto anNa solanni Puang sun tu taunNa situang kaparannuan, sia mintu’ to Napilei langsa’ Naanta’ sun situang la’tek silelean.

⁴⁴Naba’gi tondokna ba’tu pira bangsa tu tau iato mai, anna pomana’i tu kara’tasanna to sangpetayanan.

⁴⁵Kumua anna karitutui tau iato mai tu aluk Napondok Puang, sia natoe manda’ tu mintu’ Sukaran alukNa. Haleluya!