Read Toraja-Sa'dan PA’PUDIAN 106 Bible Online

PA’PUDIAN 106 - Toraja-Sa'dan bible

PA’PUDIAN 106

¹Haleluya! Pudimi tu PUANG, belanna masokan Ia, sia iatu kamasokananNa tang tileluk sae lakona.

²Mindara tu ma’din umpokada nasangi tu penggauran kalle-kalleanNa PUANG. Ba’tu ma’din unggente’-genteranni mintu’ kadipangkeranNa?

³Maupa’ tu mintu’ to ungkaritutui katonganan, sia tontong umpogau’ malolo.

⁴Kilalaina’, o Puang, sitinaya tu kamasorokamMi lako taumMi, sia tollongina’ kasalamaran lu mai Kalemi.

⁵Angku belai untiroi tu karongkosanna mintu’ to Mipilei langsa’, sia angku sende paiman sola taumMi lan kaparannuanna, sia massattuan sola tu mai to Mipomana’.

⁶Mangkamokan kasalan susito doloki, sia umpogau’mokan kakadakean sia tang mekaalukmokan.

⁷Tae’ anna palan ara’i to doloki tu mintu’ penggauran kalle-kalleamMi dio tana Mesir, sia tae’ anna kilalai tu kamasokanan budamMi, sangadinna pabali-bali dio to’ randan tasik, dio tasik Teberau.

⁸Apa Nalendokan Puang tete dio sanganNa. Nanii umpa’peissanan kuasanNa,

⁹Nasarabai tu tasik Teberau, anna marangke, anNa solanni tu tau iato mai ullamban tasik mandalan butung to unnola rante pama’.

¹⁰Susimoto Nanii Puang ullendokanni dio mai lisu pala’na to ungkabiri’i, sia Nalussuran dio mai kuasanna uali.

¹¹Mintu’ uai ussamboi nasang ualinna, naurunganni tae’mo misa’ tau tinampe.

¹²Maneri nakatappa’i tu kadanNa, sia umpenanianNi pa’pudi-pudian.

¹³Apa ta’pa tang nakilalai tau iato mai tu penggauranNa, sia tae’mo anna tayanni tu pa’timbanganNa;

¹⁴sangadinna nakendekki kamaduangan kapua tu tau iato mai dio lu padang aak, naurunganni ussandak Puang Matua dio lu padang talo.

¹⁵Nabenmi tu nakaduanginna tau iato mai, apa Napomaropu tu tau iato mai.

¹⁶Mabiri’mi tu tau iato mai lako Musa dio to’ tenda, sia lako Harun to masero dio oloNa PUANG.

¹⁷Mengangami tu padang anna amma’i tu Datan, sia nasamboi tu mintu’ to nasamaturusan Abiram.

¹⁸Dukkumi ma’lulu-lulu tu api lan to nasamaturusan, anna mampu’i dukkunna tu to tang mekaaluk.

¹⁹Iatu to Israel sola nasangi unggaraga anak sapi dio Horeb, anna penombai tu rapang-rapang dipatiri’.

²⁰Indemoto nanii tau iato mai ussondai rupa tedong sapi ungkande riu, tu To napomala’bi’.

²¹Sia nakalupaimo tu Puang Matua, To ullendokanni, tu mangka umpogau’ apa kapua dio tana Mesir.

²²Iamotu penggauran kalle-kallean dio tana Ham, sia ba’tu pira-pira apa metakuran napogau’ dio randan tasik Teberau.

²³Iamoto anNa ma’kada kumua la Nasabu’i nasang — kenna tang Musa to Napilei langsa’ bendanmo manglapa’ dio oloNa Puang, la untampang sengkeNa Puang, da anNa mangsanni tu tau iato mai.

²⁴Tang naangga’ tau iato mai tu padang ballo, sia tae’ anna katappa’i tu kadanNa.

²⁵Sangadinna ma’nuku-nuku sola nasangi lan lu tendana, sia noka umperangii gamaranNa PUANG.

²⁶Naaakki lima Puang, anna umpalao sumpa, kumua la Napasiapanan tu tau iato mai dio lu padang pangallaran.

²⁷Sia Napasiapanan tu mai bati’na dio lu to’ bangsa, sia la Napatisambo’-sambo’ lako mintu’ tondok.

²⁸Mintu’i massola nasang sikadamakmo Baal-Peor, anna kande apa dipemalaran lako apa tang kepenaa.

²⁹Iamoto nanii umpatiludak kasengkeanNa Puang napobua’ penggauranna, naurunganni ma’kasolang-solang tu parri’ dio lu tau iato mai.

³⁰Bendanmi tu Pinehas attu iato umbussui kakadakean. Namane radan tu parri’ iato.

³¹Iamoto tu dibilang napomalolo landa’ lako disituran-turananni tontong sae lakona.

³²Sia napatiludak tu kasengkeanNa Puang dio to’ uai Meriba, naurunganni urrampoi sussa tu Musa natumang tau iato mai.

³³Belanna pabali-bali sola nasangi lako Penaanna Puang, Napourunganni lendu’ tu kadanna Musa.

³⁴Tae’ra anna sabu’i tau iato mai tu bangsa iato, susitu mangka Napokadanni PUANG.

³⁵Sangadinna umpasirau ta’nak to kapere’ kalena, anna peolai tu mintu’ penggauranna.

³⁶Sia napenombai dukapa tu rapang-rapang dipodeatanna tau iato mai, tu butung poya lako kalena.

³⁷Ondongpi Napemalaran duka tu mai anakna muane sia baine lako mintu’ deata masussuk.

³⁸Sia umpatibollo rarana to tang sala, iamotu rarana anakna muane sia anakna baine, tu napemalaran lako mintu’ rapang-rapang dipodeata dio lu tana Kanaan, naurunganni narutai rarana tu tana iato.

³⁹Susimoto nanii urruttakki tu kalena tete dio gau’na, sia ma’gau’ sala bannang dio penggauranna.

⁴⁰Iamo bannangna to anna ma’lulu-lulu tu kasengkeanNa PUANG lako taunNa, sia Nasayu pallan tu to Napomana’;

⁴¹Nasorongmi tu tau iato mai tama lisu pala’na ba’tu pira-pira bangsa, napourungi naparenta to ungkabiri’i.

⁴²Iatu tau iato mai napakario-riomo mintu’ ualinna, naurungan umpopengkanorongi tama lisu pala’na.

⁴³Pembuda Narampanan Puang tu tau iato mai, apa pabali-bali unturu’ tanan penaanna, anna urunganni malabu tu tau iato mai nakabu’ kakadakeanna.

⁴⁴Moi anna susito, ke Natiroomi tu kamandasanna tau iato mai, sia ke Narangioi tu mai pengkamala’na.

⁴⁵Sia belanna diona la napomelona tau iato mai, Nakilalaimi Puang tu basseNa, anNa maturu-turu sitinaya kamasokanan budanNa.

⁴⁶Sia Napabu’tu tu kamamasean lako tau iato mai, lan ba’tengna mintu’ to urrampai.

⁴⁷O PUANG, Kapenombangki, lendokangkan, sia pasidurukkanni sule lan mai to’ ba’tu pira bangsa, angki pudi sanga maseroMi, sia massattuan lan kadipudiamMi.

⁴⁸Mintu’na kadipangkeran lu lako nasang PUANG, Kapenombanna to Israel, tempon dio mai landa’ lako attu situran, sia sipatu mintu’ bangsa iato, la ma’kada kumua: Amin! Haleluya!