Read Toraja-Sa'dan PA’PUDIAN 107 Bible Online

PA’PUDIAN 107 - Toraja-Sa'dan bible

PA’PUDIAN 107

¹Pudimi tu PUANG, belanna masokan Ia, sia iatu kamasokananNa tang tileluk sae lakona.

²Sipatu tu kada iato nasa’bu’ mintu’ to Nalendokan PUANG, tu Nalendokan dio mai lisu pala’na uali.

³Sia iatu to Napasikorok londong dio mai mintu’ tondok, dio mai matallo matampu’, daa mai ulunna salu lo’ mai pollo’na uai.

⁴Mintu’i massola nasang salamba salaomo dio lu padang aak dio to’ lalan makarorrong. Sia tae’ kota naappa’ la nanii torro.

⁵Topomi tu tau iato mai sia ma’rang, naurungan tang ussau’mi.

⁶Iatonna iato meongli’mi langngan PUANG tu tau iato mai lan kamandasanna, anNa rampananni dio mai kamaparrisanna.

⁷Narenden mana’pamo tu tau iato mai lako lalan marante, kumua anna rampo lako kota tu la nanii torro.

⁸Sangapaoi anna pudii tau iato mai tu PUANG belanna kamasokananNa, sia iatu belanna mintu’ penggauran kalle-kalleanNa lako ma’rupa tau!

⁹Belanna Napapayamo tu penaa ma’rangna, sia iatu penaa topona Napedia’imo kameloan.

¹⁰Iatu mintu’ to torro lan kamalillinan sia kapi’tukan, manda’ napori kamandasan sia rante bassi.

¹¹Belanna umbali-bali kadanNa Puang Matua sia untapa’ pa’timbanganNa Patodoranna.

¹²Iamo bannangna to anNa pabussui kamandasan tu penaanna tau iato mai; tisumbangmi tu tau iato mai natae’ tu to patunduanna.

¹³Iatonna iato meongli’mi langngan PUANG lan kamandasanna, anNa lendokanni dio mai kamaparrisanna.

¹⁴Iamo ussolanni sun lan mai kamalillinan tu tau iato mai sia kapi’tukan, sia urra’ta’i tu mai pungona.

¹⁵Sangapaoi anna pudii tau iato mai tu PUANG belanna kamasokananNa, sia tu belanna mintu’ penggauran kalle-kalleanNa lako ma’rupa tau.

¹⁶Belanna mangkamo umpatipa’rama-rama ba’ba tambaga, sia urrebong pesalli’ bassi.

¹⁷Iatu to baga narua parri’, natumang gau’ tang malolona sia mintu’ kakadakeanna.

¹⁸Iatu penaanna nakoda’ ma’rupa-rupa kande, naurunganni sidi’mora natileak tama bambana mukkun.

¹⁹Iatonna iato meongli’mi langngan PUANG lan kamandasanna, anna lendokanni dio mai kamaparrisanna.

²⁰Umpasaemi kadanNa, sia Napamondo tu tau iato mai, anNa lendokanni tu tau iato mai dio mai tang merambu.

²¹Sangapaoi anna pudii tau iato mai tu PUANG belanna kamasokananNa, sia tu belanna mintu’ penggauran kalle-kalleanNa lako ma’rupa tau.

²²Sangapaoi anna penombanni tau iato mai tu pemala’ pa’pudian, sia mela’tek umpa’peissanan penggauranNa Puang.

²³Iatu mintu’ to umpalingka kappala’na lan tasik, sia iatu to ma’balili lan tasik kalua’.

²⁴Tau iamoto mai tu untiro mintu’ penggauranNa PUANG, sia mintu’ tanda kalle-kalleanNa lan lu to’ uai mandalan.

²⁵Ma’kadami umpasae angin bara’, tu umpakapua mintu’ bombangna.

²⁶Tipembobong tu tau iato mai sae langngan langi’, anna tipembassan sule rokko to’ mandalanna, sia bonnong tu penaanna napobua’ kamaparrisanna.

²⁷Titu’mu’ len sia tipa’re’ba len tu tau iato mai susito malango, naurunganni tae’mo pangilalanna.

²⁸Iatonna iato meongli’mi langngan PUANG lan kamandasanna, anNa angkaranni lan mai kamaparrisanna.

²⁹Naparadanmi tu bara’ iato, anna rapa’ tu bombang.

³⁰Sende paimanmi tu tau iato mai, belanna rapa’ nasangmo, sia Nasolan mana’pa Puang tu tau iato mai lako kakendenan nakamali’.

³¹Sangapaoi anna pudii tau iato mai tu PUANG belanna kamasokananNa, sia iatu belanna mintu’ penggauran kalle-kalleanNa lako mintu’ ma’rupa tau.

³²Sangapaoi anna pakala’bi’I lan kombongan pa’tobudan, sia napudi-pudi lan kombongan ada’na pekaamberan.

³³Napopembali padang pangallaran tu mai salu, sia umpaba’ta’ kalimbuang.

³⁴Sia padang lompo Napopempadang ma’sin, natumang kakadakeanna to umpa’tondokki.

³⁵Ia umpopembali polei limbong tu padang pangallaran sia Napopembali kalimbuang tu padang ba’ta’.

³⁶Indemoto Napannianni tu mai to topo, naurunganni ullepong misa’ kota lan nanii ma’tondok.

³⁷Anna tu’i tu mintu’ pa’lakna sia unggaraga pa’lak anggoro’, anna pabu’tu burana.

³⁸Napamasakkei tu tau iato mai, naurunganni memba’ka’ kalle-kallean, sia mintu’ patuoanna tae’ anNa pakati’pekanni.

³⁹Apa undinna diurakki tu tau iato mai sia nabokkok kamaparrisan sia sara’ inaa.

⁴⁰Napamatuna duka tu mintu’ to la’bi’, sia Napapusa tu tau iato mai dio lu padang talo, tang dibatattana.

⁴¹Apa Narinding pala’ tu to mase-mase dio mai kadipakario-rioan, sia Napamakamban tu pa’rapuanna ten to domba sia bembe’ ma’baanan.

⁴²Iatu to ma’bulo lollong parannu paiman la untiroi tu iannato, na iatu mintu’ kakadakean la ma’loko-loko.

⁴³Mindara tu kinaa? Iatu to kinaa sipatu umparinaai tu iannate, sia umpariba’tengi tu mintu’ tanda mamaseNa PUANG.