Read Toraja-Sa'dan PA’PUDIAN 112 Bible Online

PA’PUDIAN 112 - Toraja-Sa'dan bible

PA’PUDIAN 112

¹Haleluya! Maupa’ tu to ungkataku’ PUANG, sia to ungkamali’ tonganni tu pepasanNa.

²Iatu bati’na la paa lan lino, sia mintu’ taruk bulaanna to ma’bulo lollong la diparongko’.

³Lan banuanna ponno ianan sanda makamban sia kasugiran, sia iatu kamaloloanna tang tileluk sae lakona.

⁴Iatu lu lakona to ma’bulo lollong bu’tu ia tu Masiang lan malillinna, Iamo Ia tu maturu-turu sia mamase na malambu’.

⁵Maupa’ tu to mamase sia masorok ma’pasuka’, sia to ungkareai melo tiku rindingna.

⁶Belanna tae’ anna la tilende’ tontong sae lakona, sia iatu kadikilalaianna to malambu’ matontongan sae lako.

⁷Tae’ anna kataku’ kareba kadake, belanna batta’ tu penaanna, tu ussande’i lako PUANG.

⁸Batta’ tu penaanna sia tae’ anna mataku’ len, sae lako natirona situang kaparannuan tu kamandasanna mintu’ ualinna.

⁹Tibungka’mo pala’ mamasena sia mamengan lako to mase-mase, iatu kamaloloanna tontong sae lakona, sia salobo’-lobo’na tu tandukna mala’bi’.

¹⁰Iatu to tang mekaaluk rosso la untiroi tu iannato umpasisange’ isinna, anna poton; sia iatu kamaduanganna to tang mekaaluk tang lolo’.