Read Toraja-Sa'dan PA’PUDIAN 116 Bible Online

PA’PUDIAN 116 - Toraja-Sa'dan bible

PA’PUDIAN 116

¹Kukamali’ tu PUANG, belanna Natanannimo talinga tu kadangku sia pengkamoyaku.

²Belanna Napalidannimo’ talinga, iamoto angku la meongli’ (lako Kalena) angge tuoku.

³Naluang sambanna’ ulangna kamatean, sia Narampoimo’ parri’ lino to mate, kuperasaimo tu kamaparrisan sia karossoan.

⁴Apa meongli’na ussa’bu sanganNa PUANG: o PUANG, karimmanni tu deatangku.

⁵Iatu Puang maturu-turu sia malambu’, sia iatu Kapenombanta sa’pala buda.

⁶Iatu PUANG ungkaduttu’ to tang masuangga, makuyu langkanmo’, apa Ia mangka ungkarimmannina’.

⁷E deatangku, sulemoko lako kasode-sodeammu, belanna Napogau’mo Puang tu kameloan mati’.

⁸Belanna Mirampanammo tu deatangku dio mai kamatean, sia tae’ Miparandannina’ katumangiran, sia tang Mieloranna’ tilende’.

⁹La lolangna’ dio oloNa PUANG, lan lu tondok to tuo.

¹⁰Tontongna’ ma’patongan, moi angku mangka ma’kada kumua: Pussak tonganna’;

¹¹Tongku mataku’ angku ma’kada, kukua: Tang mana’pa’ tu mintu’ tolino.

¹²Apamo la kupenomban lako PUANG, la sipakkanna mintu’ kameloanNa lako kaleku?

¹³La untadedanganna’ irusan tanda kadilendokan, angku meongli’ ussa’bu’ sanganNa PUANG.

¹⁴La umpalesso’na’ mintu’ pangallonangku lako PUANG, dio olona mintu’ taunNa.

¹⁵Keangga’ kapua dio oloNa PUANG tu kamateanna tu mai to mengkaolaNa.

¹⁶O PUANG, tonganna aku te taumMi, ondongpi inang taumMina’, sia anakna kaunanMi baine, Kamumo tu mangka ungko’ka’i tu mai pungoku.

¹⁷La kupenomban tu pemala’ pa’pudian Mati’, angku meongli’ ussa’bu’ sanganNa PUANG.

¹⁸La umpalesso’na’ mintu’ pangallonangku lako PUANG, dio olona mintu’ taunNa.

¹⁹Lan tarampak banuanNa PUANG, illan tangnga pangrante manikmu, e Yerusalem. Haleluya!