Read Toraja-Sa'dan PA’PUDIAN 125 Bible Online

PA’PUDIAN 125 - Toraja-Sa'dan bible

PA’PUDIAN 125

¹Nanian Hamaa’lot. Iatu mintu’ to umposande’ PUANG, sitinti buntu Sion, tang tibendon, sangadinna bantang sae lakona.

²Susi mintu’ buntu untikui Yerusalem, susi dukamoto tu PUANG ungkulambu taunNa, randuk totemo landa’ sae lakona.

³Belanna iatu tekken kapayunganna mintu’ to tang mekaaluk tae’ anna la masae lako dio lu to’ kataananna mintu’ to malambu’, kumua da anna kaka’i to malambu’ tu kakadakean.

⁴O PUANG, sangapaoi amMi patiroi melo tu mintu’ to melo penaanna, sia lako to ma’bulo lollong.

⁵Apa mintu’ to sepang lako lalan kelokna, la Naroto’i nasang PUANG sibaa mintu’ to umpogau’ kakadakean. Sangapaoi anna rampoi kamarampasan to tu Israel!