Read Toraja-Sa'dan PA’PUDIAN 129 Bible Online

PA’PUDIAN 129 - Toraja-Sa'dan bible

PA’PUDIAN 129

¹Nanian Hamaa’lot. Madada’na’ napakario-rio tau tempon dio mai mangurangku, — Melo ke ma’kadai tu to Israel. —

²Madada’na’ napakario-rio tau tempon dio mai mangurangku, apa tae’ sia anna talona’.

³Natengko to ma’tengko tu boko’ku, anna pemalambe’i tu lalan tengkona.

⁴Apa iatu PUANG tang pakayun bimbang anNa ra’ta’i tu rari’na to tang mekaaluk.

⁵La kasirisan sola nasang anna sule leko’, tu to ungkabiri’ Sion.

⁶La susi riu tuo dao bubungan, malayu dolomo, ke tae’pi nalampi’i tau.

⁷Tae’ anna ka’panni to meriu, sia tae’ anna patamai panguyunna to manguyun;

⁸sia iatu to lendu’ lalan tae’ anna la ma’kada kumua: Sangapaoi anNa pamasakkekomi PUANG! Kipassakkekomi tete dio sanganNa PUANG.