Read Toraja-Sa'dan PA’PUDIAN 132 Bible Online

PA’PUDIAN 132 - Toraja-Sa'dan bible

PA’PUDIAN 132

¹Nanian Hamaa’lot. O PUANG, kilalai tu Daud, sia mintu’ kamara’tasanna;

²umba nakua umpalao sumpa lako PUANG, sia mangallonan lako Puangna Yakub, Puang Umpoissan angge maritik, kumua:

³Inang tae’ angku tama tenda kunii torro, ba’tu rokko dali’ patindoangku,

⁴Sia inang tang kueloran rapa’ tu matangku, ba’tu umpara’ban bulu matangku,

⁵Ke tae’i inan kuappa’ la Nanii PUANG, tu banua la Nanii torro Puangna Yakub, Puang Umpoissan angge maritik.

⁶Tarangimo tu karebanna dio Efrata, sia taappa’mo dio padang Yaar.

⁷Melo ke tamaki’ tendaNa, sia melo ke tukkuki’ menomba diong to’ pelleseanNa!

⁸Ke’de’Komi, o PUANG, amMi male lako inan katorroamMi, la Kamu, la iatu patti kuasamMi.

⁹Sangapaoi anna umpembungku’ kamaloloan tu mintu’ to minaamMi, sia sangapaoi anna sila’tekan tu mintu’ to masallo’Mi.

¹⁰Tu bannang dio Daud, taumMi, da Mitananni boko’ tu to ditokkoMi.

¹¹Mangkamo tu PUANG umpalao sumpa kapua lako Daud, sia tae’mo anNa la ullesangi lampa kadanNa misa’i tu to sun dilassakmu la Kupaunno’ko’ dao isungan kapayungammu.

¹²Iake nakaritutui bati’mu tu basseKu sia iatu kasabi’angKu tu Kupatuduanni, manassa iatu mai bati’na la unnissungi kapayungammu tontong sae lakona.

¹³Belanna Napilei langsa’mo PUANG tu Sion, sia Naturo ta’bamo la Nanii torro.

¹⁴Iamote tu inan matontongangKu sae lakona, sia indemote tu la Kunii reso’, belanna mangkamo Kuturo ta’ba.

¹⁵La Kupamasakke kamemba’karan tu bura padangna, sia iatu to mase-masena la Kupabo’sai kande.

¹⁶Sia iatu mai to minaanna la Kubungku’ kasalamaran, anna mintu’ to sallo’na la parannu paiman unnarrak.

¹⁷Diomo la Kunii umpatuoanni misa’ tanduk tu Daud, sia Kuparandanammo palita tu to Kutokko.

¹⁸Iatu ualinna la Kubungku’ siri’, apa iatu ia, la pandillak dao ulunna tu makotana.