Read Toraja-Sa'dan PA’PUDIAN 135 Bible Online

PA’PUDIAN 135 - Toraja-Sa'dan bible

PA’PUDIAN 135

¹Haleluya! Pudimi tu sanganNa PUANG, pudimi, e mintu’ taunNa PUANG,

²tu kamu to tongkon lan banuanNa PUANG, lan tarampak banuanNa Kapenombanta.

³Pudimi tu PUANG, belanna iatu PUANG masokan, pakendekanni pa’pudian tu sanganNa, belanna mala’bi’ tu sanga iato.

⁴Belanna Napilean langsa’mo Kalena PUANG tu Yakub, sia Natonnoran bua kayumo tondon to batangNa tu Israel.

⁵Kuissan, kumua pasareongan tu PUANG, sia iatu Puangta untongloi mintu’ deata.

⁶Iami Naporai, iamo Napogau’, la dao langi’ la lan lino, la diong tasik ba’tu diong lu liku mandalan.

⁷Ia umpakendek damo’ dio randan langi’, sia umpaden kila’ situang uran, sia umpasun angin lan mai pa’palumpunanNa.

⁸Iamo mangka umpatei mintu’ anak pa’bunga’ dio Mesir, sae lako patuoan.

⁹Sia tu umpaden tanda kalle-kallean sia tanda mangnga lan tangngamu, e Mesir, lako kalena Firaun sia lako taunna.

¹⁰Iamo mangka ussabu’i ba’tu sangapa bangsa kapua, sia umpatei ba’tu pira-pira datu tarompo’:

¹¹La Sihon, datu to Amori, la Og, datu Basan, sia mintu’ kadatuan dio Kanaan;

¹²tu umpa’ba’gian padangna tau iato mai la torro mana’, misa’ mana’ Naba’gian to Israel, taunNa.

¹³O PUANG, masae lako tu sangamMi, sia iatu kadiannamMi batu silambi’, o PUANG, landa’ lako disituran-turananni.

¹⁴Belanna la Nasanda-tonganni PUANG tu taunNa, sia la Nakaturu-turui tu orangNa.

¹⁵Iatu rapang-rapang dipodeatanna to kapere’ bulaan sia salaka digaraga, iamo panggaraga tolino.

¹⁶Tonganna den tu pudukna, apa tae’ anna ma’kada, den matanna, apa tae’ anna pakita.

¹⁷Den talinganna, apa tae’ anna parangi, sia tae’ duka penaa sun lan mai sadangna.

¹⁸Iatu to unggaragai to, la ten to apa iato, susi dukato tu to umposande’i.

¹⁹E mintu’ bati’na Israel, pudimi tu PUANG! E mintu’ bati’na Harun, pudimi tu PUANG!

²⁰E mintu’ bati’na Lewi, pudimi tu PUANG! E kamu to ungkasiri’ PUANG, pudimi tu PUANG.

²¹Mintu’na kadipudian lan mai Sion lako PUANG, tu unnisungi Yerusalem! Haleluya!