Read Toraja-Sa'dan PA’PUDIAN 136 Bible Online

PA’PUDIAN 136 - Toraja-Sa'dan bible

PA’PUDIAN 136

¹Pudimi tu PUANG, pa masokan Ia, belanna iatu kamasokananna tang tileluk sae lakona.

²Pudimi tu Puang Matua undaoanni mintu’ deata, belanna iatu kamasokananNa tang tileluk sae lakona.

³Pudimi tu Puangna mintu’ puang. Belanna iatu kamasokananNa tang tileluk sae lakona;

⁴ia manna ia tu umpogau’ tanda kalle-kallean kapua, belanna iatu kamasokananNa tang tileluk sae lakona;

⁵tu To umpadadi langi’ tete dio tangnga’ kinaa, belanna iatu kamasokananNa tang tileluk sae lakona.

⁶Tu umpatiballa’ kapadanganna dao to’ kauaianna, belanna iatu kamasokananNa tang tileluk sae lakona.

⁷Tu umpaden ba’tu pira-pira arrang kapua, belanna iatu kamasokananNa tang tileluk sae lakona.

⁸Iamotu mata allo umparenta masiang, belanna iatu kamasokananNa tang tileluk sae lakona.

⁹Na bulan sola mintu’ bintoen umparenta bongi, belanna iatu kamasokananNa tang tileluk sae lakona.

¹⁰Tu To mangka umbamba lendu’ to Mesir, belanna Napatei nasang tu anak pa’bunga’na, belanna iatu kamasokananNa tang tileluk sae lakona.

¹¹Sia untassu’i to Israel lan mai tau iato mai, belanna iatu kamasokananNa tang tileluk sae lakona.

¹²Tete dio lima matoto’ sia takia’ tie’te’, belanna iatu kamasokananNa tang tileluk sae lakona.

¹³Tu mangka umballak tasik Teberau anna tipa’dua, belanna iatu kamasokananNa tang tileluk sae lakona.

¹⁴Tu umpalamban to Israel lan tangngana, belanna iatu kamasokananNa tang tileluk sae lakona.

¹⁵Apa Nabolloan tu Firaun sola mintu’ to untoe kassa’na tama tasik Teberau, belanna iatu kamasokananNa tang tileluk sae lakona.

¹⁶Tu To urrenden taunna unnola padang pangallaran, belanna iatu kamasokananNa tang tileluk sae lakona.

¹⁷Tu To ussabu’i ba’tu pira-pira datu kapua, belanna iatu kamasokanNa tang tileluk sae lakona.

¹⁸Sia tu To umpatei ba’tu pira-pira datu ma’kalalongan, belanna iatu kamasokananNa tang tileluk sae lakona.

¹⁹La Sihon datu to Amori, belanna iatu kamasokananNa tang tileluk sae lakona.

²⁰La iatu Og, datu Basan, belanna iatu kamasokananNa tang tileluk sae lakona.

²¹Tu To umpa’ba’gian padangna tau iato mai la torro mana’, belanna iatu kamasokananNa tang tileluk sae lakona.

²²Misa’ mana’ Naba’gian to Israel, taunNa, belanna iatu kamasokananNa tang tileluk sae lakona.

²³Tu mangka ungkilalaiki’ lan kamase-maseanta, belanna iatu kamasokananNa tang tileluk sae lakona.

²⁴AnNa sabak ka’tuki’ lan mai lisu pala’na mintu’ ualinta, belanna iatu kamasokananNa tang tileluk sae lakona.

²⁵Iamo umpatuo mintu’ angge menono’, belanna iatu kamasokananNa tang tileluk sae lakona.

²⁶Pudimi tu Kapenomban dao suruga, belanna iatu kamasokananNa tang tileluk sae lakona.