Read Toraja-Sa'dan PA’PUDIAN 139 Bible Online

PA’PUDIAN 139 - Toraja-Sa'dan bible

PA’PUDIAN 139

¹Lu lakona pangala sengo. Pa’pudianna Daud. O PUANG, Mitarru’mo’ sia Mitandaimo’.

²Mitandai tu diona torro ke’de’ku; sia mambelapa Mitandaimi tu lalan tangnga’ku.

³Mipelalan duka tu kalingkangku ba’tu kamatindoangku, sia mitandai tu mintu’ tengkaku.

⁴Belanna tae’ misa’ tu tongka’ dililaku, tu tang Miissan, o PUANG,

⁵Mitandimo tu tingayo boko’ku, sia Miremme’na’ limamMi.

⁶Iatu kapaissanan iato lendu’ namangngaingku, sia lendu’ mandalanna, tang kulambi’.

⁷Umbara la kuola untoyangan PenaamMi? Ba’tu umbara la kuola umpallaian oloMi?

⁸Iake la lu langnganna’ langi’, na daoKomi; iake la umbambanganna’ kaleku lan lino to mate-anna lanKomi.

⁹Iake la unnangkaranna’ pani’ passisinna randan langi’, angku torro dio tampak tasik,

¹⁰inde dukato la nanii urrendenna’ limamMi. Sia natoena’ lima kananMi.

¹¹Iake kukuai kumua: Melo ke nasamboina’ malillin, anna bongi membali masiang untikuina’;

¹²iatu malillin tae’ anna kullei urrerung apa dio mai Kalemi, sangadinna iatu bongi masero susi masiang, iatu malillin na masiang pada bang sia.

¹³Belanna Kamu ungkombong nasangi tu lanna tondon to batangku, sia umpasanda rangka’na’ lan pa’tambukanna indo’ku.

¹⁴KupudiKomi, belanna memangngan tongan tu kakombongangku; sia memangngan tu mintu’ penggauramMi. Nakanassai tongan penaangku tu diona to.

¹⁵Iatu mai bukungku tae’ karerungan dio mai Kalemi, tongku digaraga buni, sia tongku dikombong lan atena padang.

¹⁶Nata’pai dukamo matamMi tu a’gangku tongku mane kombong rara; sia tisura’mo lan luntara’Mi, tu mintu’ allo la dipaka’pananna’, tonna tae’ bangpa ma’rupa.

¹⁷O Puang Matua, lendu’ ia kapuana gai’na lako kaleku tu mai lalan tangnga’Mi. Sia tang dikemba’ dibilang.

¹⁸Iake la kubilangi mandu buda ia anna karangan; sia iake millikna’, tontong bangpoKomi kupalan penaa.

¹⁹O Puang Matua, sabu’i tu mintu’ to tang mekaaluk — sia kamu, e to umpato’do rara, mallaikomi dio mai kaleku. —

²⁰Tu pakelo sangka’ unneaKomi. Tu umpa’pakenan sangamMi, iamo ualimMi.

²¹O PUANG, tang kukabiri’raka tu mintu’ to ungkabiri’Komi? Sia tang kukasorroraka tu mintu’ to umbaliKomi?

²²Lendu’ kukabiri’na liu tu tau iato mai, sia kupasangtinti uali.

²³Pelalan kummanna’, o Puang Matua, sia tandai tonganni tu penaangku, sudina’, sia tandai tu ba’tengku lan;

²⁴manta-mantana’, ba’tu tang denri lalan kadake bu’tu dio kaleku, amMi rendenna’ lako lalan matontongan!