Read Toraja-Sa'dan PA’PUDIAN 143 Bible Online

PA’PUDIAN 143 - Toraja-Sa'dan bible

PA’PUDIAN 143

¹Pa’pudianna Daud. O PUANG, perangii tu passambayangku, sia tananni talinga tu pengkamoyaku; baliina’ tete dio kamarurusamMi sia kamaloloamMi.

²Da Mipasilindoi kadiparessan tu taumMi, belanna moi misa’ rupa tau tae’ malambu’ dio oloMi.

³Belanna iatu uali naula’ sumpumo tu deatangku sia nalullu’ tu sumanga’ku rokko padang, sia napanno’ko’na’ lan to’ malillinna butung to masai allomo mate.

⁴Iamoto anna raa tu sumanga’ku lan, sia dengnga’ tu penaangku illan tondon to batangku,

⁵Tilanta’mi lan ara’ku to allo mangka diboko’, angku timbang-timbangi tu mintu’ panggaragamMi, sia untangnga’-tangnga’ mintu’ lalan limamMi.

⁶Mempala’na’ mati’ Kalemi, sia mamali’ tu penaangku Mati’. Ten to padang ba’ta’ ungkamali’ uai. Sela

⁷O PUANG, madomi’Komi umbalina’, belanna sau’mo tu penaangku, da Mibunianna’ lindoMi, da angku ten to kabu’ rokko pa’tambunan.

⁸Pasomboanna’ kamasokanamMi, ke makale’, belanna sande’ mati’na’ Kalemi; patiroanna’ tu lalan sipatu la kuola, belanna Mati’ kunii umpakendek penaangku.

⁹O PUANG, rampananna’ dio mai mintu’ ualingku, mati’ Kalemi tu kunii mentilindung.

¹⁰Patuduna’ umpogau’ pa’poraiamMi, belanna Kamumo tu Kapenombangku, sangapaoi anna rendenna’ tu Penaa masokanMi illan padang rampa’.

¹¹O PUANG, rinding pala’na’ tete dio sangamMi, sia rampananna’ dio mai kamaparrisan tete dio kamaloloamMi.

¹²Sabu’i tu mintu’ ualingku tete dio kamasokanamMi, sia roto’i tu mintu’ to umpasumpuna’, belanna akumo tu taumMi.