Read Toraja-Sa'dan PA’PUDIAN 144 Bible Online

PA’PUDIAN 144 - Toraja-Sa'dan bible

PA’PUDIAN 144

¹Pa’pudianna Daud. Mintu’ kadipudian lu lako nasang PUANG, buntu batungku, tu umpopa’biasa limangku parari, sia umpopa’biasa rangka’ku umbua’ mataran.

²Iamo kamasokanangku sia tambakukungku, sia bentengku na patunduangku, sia balulang toto’ku, sia pentilindungangku, sia tu umpatundukanna’ ba’tu pira-pira bangsa.

³O PUANG, apa toda ia tu tolino, amMi pokariangananri? Sia iatu ma’rupa tau, amMi saileri?

⁴Iatu to lino ten to damo’, sia iatu sunga’na butung bayo-bayo pa’de poton.

⁵O PUANG, palempei tu langi’Mi, amMi songlo’, tumbui tu mai buntu, anna merambu.

⁶Popellepa’i tu kila’Mi, amMi pasisarak-sarakki tu tau iato mai, palaoi tu tinaramMi, amMi patisambo’-sambo’i.

⁷Popengkorongi tu limamMi dao mai masuanggana, lendokanna’ sia endekanna’ diong mai to’ uai buda, sia dio mai lisu pala’na to sae,

⁸tu tongka’ dililana ussa’bu’ mo’rang, sia iatu lima kananna lima bulituk.

⁹O Puang Matua, la kupenaniangKomi misa’ nanian ba’ru, sia la kupakendekangKomi pa’pudian kupasibarrung dandi sangpulo ritinna,

¹⁰Mati’ Kalemi, tu umben kapataloan mintu’ datu, sia urrampanan Daud, taumMi dio mai bassi mesabu’i.

¹¹Lendokanna’ sia rampananna’ lan mai lisu pala’na to sae, tu tongka’ dililana ussa’bu’ mo’rang, sia iatu lima kananna lima bulituk.

¹²Sangapaoi tu mai anakta muane, ke mangurapi anna maloboran susi tananan, sia sangapaoi tu mai anakta baine anna susito batu petau dipa’ napomaramba’ tongkonan layuk.

¹³Sangapaoi anna buke tu mai alangta, ponno bura padang sanda umba’na, sia mintu’ patuoanta membati’ massa’bu’-sa’bu, ondongpi ma’lampa-lampa dio lu panglambaranta.

¹⁴Sangapaoi anna iatu sapinta la kianak rundun taun sia tang su’pik anakna, sia anna tae’ uali ullaoiki, sia ullo’do’ki’ sia tae’ kamarukkan dirangi lan lu tutu lalanta.

¹⁵Maupa’ tu bangsa ten to tu a’ganna, sia maupa’ tu bangsa umpoKapenomban PUANG!