Read Toraja-Sa'dan PA’PUDIAN 145 Bible Online

PA’PUDIAN 145 - Toraja-Sa'dan bible

PA’PUDIAN 145

¹Nanian pa’pudi-pudianna Daud. La kupakarayaKomi, o Kapenombangku, o Datungku, sia la kupudi tu sangamMi tontong sae lakona.

²La kupakarayaKomi kiallo-kiallo; sia la kupudi tu sangamMi tontong sae lakona.

³Iatu PUANG pasareongan, sipatu tongan dipudi, iatu kapasareongananNa tang dilambi’ diukkunni.

⁴Tontong disipapa’i dipudi tu panggaragamMi, sia dipa’peissanan tu mintu’ penggauran kalle-kalleamMi.

⁵La kusa’bu’ tu kakapuanna kamala’biran madatumMi sia mintu’ penggauran memangngamMi.

⁶La napokada tau tu kalle-kalleanna penggauran metakuramMi, sia la kuulelean tu diona kapasareonganamMi.

⁷La napa’peissanan tau tu tanda pengkilalan diona kamasokanan kapuaMi, sia la mela’tek umpudii kamaloloamMi.

⁸Iatu PUANG maturu-turu sia mamase, kalando pesuka’ sia kapua tu kamasokananNa.

⁹Iatu PUANG masokan lako mintu’ tau, sia situtu’ mamaseNa tu mintu’ penggauranNa.

¹⁰Mintu’ penggauramMi la umpudiKomi, o PUANG, sia mintu’ to masallo’Mi la umpangke’Komi;

¹¹La naulelean sola nasangi tu kamala’biranna kadatuamMi, sia ussa’bu’ kuasa kalle-kalleamMi.

¹²Anna pa’peissananni tu penggauran kalle-kalleanNa lako ma’rupa tau, sia iatu kakapuanna mala’bi’na kadatuanNa.

¹³Iatu kadatuamMi misa’ kadatuan matontongan sae lakona, sia iatu kapayungamMi tontong sipapa’.

¹⁴Iatu PUANG untulak mintu’ to la tobang, sia umpakalolo mintu’ to tikongko.

¹⁵Mintu’ tau untayanKomi, amMi benni barra’ karoenna, ke attunnai.

¹⁶Mibungka’ tu lisu pala’Mi, amMi pedia’i kamanamanan tu angge menono’.

¹⁷Malambu’ tu PUANG dio mintu’ lalanNa, sia masokan lan mintu’ penggauranna.

¹⁸PUANG urreke’ mintu’ to meongli’ lako Kalena, tu to lantuk meongli’ lako Kalena.

¹⁹La napopembua malapu’ tu panganga’na mintu’ to ungkataku’I, sia la Natananni talinga tu pengkamoyana, anna lendokanni.

²⁰Iatu PUANG urrinding pala’ mintu’ to ungkamali’I, apa Nasabu’i tu mintu’ to tang mekaaluk.

²¹La nasa’bu’ tongka’ dililaku tu mai kada umpudi PUANG, sia sangapaoi anna mintu’ kepenaanna umpudi tu sanga maseroNa landa’ sae lakona.