Read Toraja-Sa'dan PA’PUDIAN 147 Bible Online

PA’PUDIAN 147 - Toraja-Sa'dan bible

PA’PUDIAN 147

¹Pudimi tu PUANG, belanna melo tu umpakendekan pa’pudian Kapenombanta, belanna iatu iannato mala’bi’, sia iatu pa’pudi-pudian sielle’.

²PUANG tu umbangun Yerusalem, sia umpasipulungi sae tu mintu’ to Israel diula’i lan mai tondokna.

³Ia umpamondoi tu mintu’ to bonnong penaanna, sia Nabimbin tu mai bangkena.

⁴Ia ussuka’i tu bilanganna bintoen, sia pantan Nasa’bu’ tu sanganna.

⁵Pasareoangan tu Puangta sia sumpu kuasa, tang dilambi’ tu tangnga’ kinaanNa.

⁶PUANG umpabatta’ to sorong inaa, apa mintu’ to tang mekaaluk Napamadiongan sae rokko padang.

⁷Penanianni nanian pa’kurre sumanga’ tu PUANG, pakendekanni pa’pudian tu Kapenombanta dipasibarrung oni katapi.

⁸Tu to umpasitutu’i salebu’ tu langi’, sia umpadenanni uran tu lino, sia umpatuoi riu tu mai tanete.

⁹Sia To umbenni kande tu mai patuoan, sia lako mintu’ anak kaduaya ke ma’kaa’-kaa’i.

¹⁰Tae’ naalai penaanna tu kamawatangan darang, sia tae’ Naporai tu bi’ti’ telang loli.

¹¹Iatu PUANG Naporai tu to ungkataku’I, sia iatu to urrannuan kamasokananNa.

¹²Pakala’bi’I tu Puang, e Yerusalem, pudimi tu Kapenombammu, e Sion!

¹³Belanna Ia mangka umpematoto’i tu salli’ babangammu, sia umpamasakke mintu’ anakmu lan.

¹⁴Iamo umpaden karapasan lan mintu’ lili’mu, sia umpedia’iko gandung malapu’.

¹⁵Ia umpasonglo’ parentaNa tama lino, sia iatu kadanNa matira’ tongan lolang.

¹⁶Ia umpasonglo’ ambun makko susito kapa’, sia unnambo’ damo’ makko butung au.

¹⁷Ia umpasonglo’ uran batu ma’kale’dang-le’dang, mindara la untananni narua kamasangkanganNa?

¹⁸Napasonglo’ tu parentaNa, anna palollo’ nasangi, Napopangiri’ tu anginNa, naurungan lolong nasang tu uai.

¹⁹Mangkamo Napokadan Yakub tu kadanNa, sia Napasanammo Israel tu mai apa Napondok sia mintu’ atoranNa.

²⁰Tae’ misa’ bangsa senga’ Nanii umpogau’i susito, iamoto anna tae’ naissanni tau tu mintu’ atoranNa. Haleluya!