Read Toraja-Sa'dan PA’PUDIAN 148 Bible Online

PA’PUDIAN 148 - Toraja-Sa'dan bible

PA’PUDIAN 148

¹Haleluya! Pudimi tu PUANG lan mai batara. Pudimi lan masuanggana!

²Pudimi, e mintu’ malaeka’Na, pudimi, e mintu’ petoe kassa’Na!

³Pudimi, e allo sia bulan, pudimi, e mintu’ bintoen tasak.

⁴Pudimi, e masuanggana langi’, sia e kamu, mintu’ uai dao langi’!

⁵Mintu’i to la umpudi sanganNa PUANG, belanna mangkamo Ma’kada anna dipadadi nasang.

⁶Ia umpatorro inannai tu mintu’na la tontong sae lakona. Sia umpondok misa’ atoran tang ma’din natodo tinting.

⁷Pudimi tu PUANG diong mai lino, e mintu’ olo’-olo’ kalle-kallean lan tasik sia liku mandalan,

⁸E api, sia uran batu sia ambun makko na rambu roya, e angin bara’, tu umpalolang kadanNa Puang.

⁹E mintu’ buntu sia tanete, sia mintu’ kayu membua sia arasi’.

¹⁰Mintu’ olo’-olo’ lampung sia manaranna, sia mintu’ mendonglo’na, sia manuk-manuk kepani’.

¹¹E kamu mintu’ datu lan lino, sia mintu’ to sangpetayanan, sola mintu’ tedong pariu’na tondok, na mintu’ to torro ada’ lan te lino.

¹²E kamu pia muane sia anak dara, to matua to mangura massola nasang.

¹³La napudi massola nasang tu sanganNa PUANG, belanna sanganNa mannari ia tu patongloan liu, sia kamala’biranNa ussamboi lino na langi’.

¹⁴Iamo umpalayanganni misa’ tanduk tu taunNa, tu napotarompo’ mintu’ to masallo’Na, iamotu to Israel, bangsa mase’pon dio Kalena! Haleluya!