Read Toraja-Sa'dan PA’PUDIAN 16 Bible Online

PA’PUDIAN 16 - Toraja-Sa'dan bible

PA’PUDIAN 16

¹Ianan ballona Daud. Karimmannina’, o Puang Matua, belanna Kamu kuposande’.

²Kukua lako Puang: Kamumo tu Puangku, Kamu manna tu nanii kameloangku!

³Na iatu mai to masallo’ lan te lino: Iamo mala’bi’, dio tau iato mai nanii kasendeangku.

⁴Sitodon tampomo tu kamaparrisanna, to umpengkanorongi (deata) senga’! Nokana’ untedokki tu mai rara napenomban tau iato mai, ba’tu ussa’bu’i randan dipudukku tu sanganna.

⁵PUANGmo tu ba’gi kupomana’ sia luangna irusangku, Kamu duka tu umpantok serongku.

⁶Ditintingammo’ padang ballo kupoba’gi, ondongpi iatu mana’ku to, kupopaiman.

⁷La umpudina’ PUANG tu umpatuduna’, pissanmi to napatiangka’na’ sukaran inaangku ke mabongi.

⁸Dio bang lindoku tu PUANG kusa’ding; belanna dio kananku tu Puang, iamoto anna tae’ angku la tilende’.

⁹Iamoto anna parannu penaangku sia sende paiman deatangku, sia iatu batang kaleku la torro marampa’!

¹⁰Belanna tae’ Mila unneloranni tu sumanga’ku tama lino to mate, sia tae’ Mieloranni tu to Mipakaboro’ unnisungi inan tang merambu.

¹¹Mipokadanna’ lalan katuoan; dio oloMi den kaparannuan media’i; sia dio kananMi den kasode-sodean tontong sae lakona.