Read Toraja-Sa'dan PA’PUDIAN 17 Bible Online

PA’PUDIAN 17 - Toraja-Sa'dan bible

PA’PUDIAN 17

¹Passambayangna Daud. Perangii tu malambu’na, o PUANG! sia palan ara’i tu pengkamoyaku, tananni talinga tu passambayangku tu nasa’bu’ randan puduk tang ma’bangko malute.

²Melo ke bu’tu dio mai oloMi tu kadipaolaiangku salu, belanna natiro matamMi tu salunna.

³Iake ussandakKomi penaangku, sia umparessana’ ke mabongi, sia ussudina’, na moi misa’ tae’ la diappa’ iake susinna salai tu tangnga’ku, tae’ duka sia nasun dio pudukku.

⁴Diona penggauranna mintu’ tolino, susitu kada sun dio randan pudukMi, angku toyangammo kaleku dio mai mintu’ lalanna to patoro’ buku.

⁵Tumengkana’ tontong urrundu’ lalanMi; natang tilende’ tu lentekku.

⁶Metambana’ lako Kalemi, belanna Miperangiina’, o Puang Matua; tanannina’ talingamMi, sia perangii tu kadangku.

⁷Pakalle-kalleammi tu tanda mamaseMi, o Puang tu ullendokan to mentirerung dio kananMi dio mai mintu’ to unneai.

⁸Karimmannina’ butung to mata tau; sia rerungna’ diong to’ pani’Mi.

⁹Dio mai to tang mekaaluk tu umbala’-bala’na’, iamotu uali ungkabiri’ liuna’, tu ullimbuina’.

¹⁰Tu tang natamai kada tu penaa titutu’na, sia umpasun kada matampo.

¹¹Totemo napatama limbumokan lan mintu’ kalingkangki, napaula’i bangkan matanna la morai umpessambakangkan rokko padang.

¹²Butungi to singa maduang la ussammang pealanna, sia butung to anak singa ma’pakari’di’ lan to’ kabunianna.

¹³Ke’de’Komi, o PUANG, tingngoi tu tau iato mai, sia pemparrakanni amMi rampananni la’bo’Mi tu katuoangku dio mai to tang mekaaluk.

¹⁴Na limamMi urrampananna’ dio mai tau iato mai, o PUANG, iamotu to umbudanan lino, tu katuoan ia manna te napotaa, amMi patamai apa pura Miparandananni tu tambukna, sia napodia’ dukai anakna, sia iatu sesanna la natampean bati’na.

¹⁵Apa iatu aku situang kamaloloan la untiro lindoKomi, iake malimbangunmo’i, dia’ penaangku untiro rupamMi.