Read Toraja-Sa'dan PA’PUDIAN 18 Bible Online

PA’PUDIAN 18 - Toraja-Sa'dan bible

PA’PUDIAN 18

¹Lu lakona pangala sengo. Lu dio mai Daud, taunNa Puang Matua, tu umparampoi langngan Puang Matua tu mintu’ buena sengo iate, tonna rampananni PUANG dio mai mintu’ ualinna sia dio mai Saul.

²Nakua: Ponno tongan penaangku, ungkamali’Komi, o PUANG, oto’na kamatotorangku,

³O PUANG, buntu batungku sia tambakukungku sia To urrampananna’, Iamo kapenombangku sia buntu batungku, tu kunii mentirerung, Iamo kupobalulang, sia tanduk kasalamarangku, sia pentionganan layukku.

⁴Metambana’ kumua: AnNa dipudimora tu PUANG! Tu belanna tilendokna’ dio mai mintu’ ualingku.

⁵Nabi’bi’na’ mintu’ pearra’ kamatean, sia natu’ba’na’ darra’ kasanggangan;

⁶naerrena’ mintu’ pearra’ lino to mate; sia la naalana’ mintu’ poya kamatean.

⁷Iatongku lan kamatakuran meongli’na’ langngan PUANG, sia mengkamoyana’ lako Kapenombangku. Narangimo tu gamarangku lan banua kabusunganNa, sia rampomo tama talinganNa tu pengkamoyaku.

⁸Lino’mi tu padang sia tigega’, sia mintu’na garonto’ tanete tiseno, sia tigega’ belanna kare’dekanna ara’Na.

⁹Sun tu rambu dao mai illongNa, sia api lan mai sadangNa ma’pamampu’, anNa popa’lulu-lului tu ruaya.

¹⁰Napalempemi tu langi’ anNa mengkalao, na iatu lillinan parrak, diongna lu lentekNa.

¹¹Ussakeimi karubion Namettia’, sia sumayo dao pani’ angin.

¹²Malillin Napopembungku’, sia Napopentirerungan untikuI, iamotu uran pittuk sia salebu’ makamban.

¹³Iatu naninna arrang dio oloNa tipoli’ dio mai tu salebu’ makamban, sia uran batu sia ruaya borrong.

¹⁴Gumalugumi tu PUANG dao langi’, sia umpatialling gamaranNa tu Puang Patodoranna — (uran batu sia ruaya borrong).

¹⁵Napa’panan tu tinaranNa anNa pasisarak-sarakki tu tau iato mai, Napellebaranni tu kila’ sia Napasisarambuan tu tau iato mai.

¹⁶Iato attu iato payanmi tu mintu’ sali tasik, sia mintu’ parandangan lino sombo duka, tu belanna pegarrakMi, o PUANG, sia belanna pa’pamurru’na penaamMi dao mai illongMi.

¹⁷Naulumi tu limanNa dao mai unnalana’, Nariu’na’ lan mai uai luang.

¹⁸Narampananna’ dio mai mintu’ uali lalongku, sia dio mai to ungkabiri’na’ belanna nasau’na’ tau iato mai.

¹⁹Iatongku maparri’ narukka’na’ tau iato mai, apa PUANG ussande’na’.

²⁰Nasolammo’ sun lako inan malona’, sia Narampananna’, belanna Napopaimanna’.

²¹Napapatuimo’ PUANG sitinaya kamaloloangku, sia Napapakkannina’ sitinaya kamasero-pindananna limangku.

²²Belanna kuturu’mo tu mintu’ lalanNa PUANG sia tae’ bangpa angku sala’ kedo sepang dio mai Kapenombangku.

²³Belanna mintu’na atoranNa tontong kupalan ara’, sia tae’ angku patoyangi tu Napondokna.

²⁴Sangadinna bulo lollong tu penaangku lako Kalena, sia ungkaritutuina’ kaleku dio mai kakadakean.

²⁵Iamoto anNa papakkannina’ PUANG sitinaya kamaloloangku, sia sitinaya kamasero-pindananna limangku dio oloNa.

²⁶Lako to maruru’ Mikaruru’i duka, sia lako to tae’ sayuanna, Mipemaloloan penaa,

²⁷Sia lako to masallo’, Mikasallo’i duka. Apa lako to leko’ penaanna, Miuali.

²⁸Kamumo ullendokanni tu bangsa dipandasa, apa Mipopengkadiongan tu mintu’ to patiro solo’.

²⁹Belanna Kamumo umpamarorrong palitangku, sia PUANG, Kapenombangku, umpopembali maseroi tu kamalillinangku.

³⁰Belanna Kamu dukari angku laoi sangtuntunan surodadu, sia Kapenombangkuri angku leanni benteng batu.

³¹Iatu Puang Matua sundun tu lalanNa; iatu kadanNa Puang tang kabissikan. Iamo napobalulang mintu’ to umposande’I.

³²Belanna mindara senga’na tu Kapenomban, ke tang PUANG, sia mindara senga’na tu buntu batu, ke tang Kapenombanta?

³³Iamotu Kapenomban umpatambeke’ina’ kamabukuan, sia umpamarante lalanku.

³⁴Napaten to lentek donga birang tu lentekku, sia Napatulangdanna’ dao inan matandeku.

³⁵Napopa’biasa tu limangku parari, naurunganni malute tu limangku unggittingan ulang pana tambaga.

³⁶Mikamasean dukamo’ balulang kadikarimmanan lu dio mai Kalemi, sia natulakmo’ lima kananMi, sia napamatandemo’ kamasokanamMi.

³⁷Mipakalona’mo tu kuninna mentengka, natae’ natiparedok tu pa’gallangangku.

³⁸Mangkamo kuula’ sumpu tu ualingku angku lambi’i, sia tae’ kusule, ke tang kumangsanni nasangpi.

³⁹Mangkamo kupessambakan naurunganni tang nakullemo malimbangun sule, sia tibambang diong to’ lentekku.

⁴⁰Belanna mangkamoKomi umpatambeke’ina’ kamabukuan la parari; sia mangkamo Mipatunduk lako kaleku tu mintu’ to unneana’.

⁴¹Mipopemboko’mo mallai tu mintu’ ualingku, sia kumangsannimo tu mintu’ to ungkabiri’na’.

⁴²Metambamo tu tau iato mai, apa tae’ misa’ tau untundui, metamba lako PUANG, apa tae’ Napebalii.

⁴³Kunisak-nisakmo tu tau iato mai butung to barra’-barra’ napentiaran angin, sia kulullu’-lullu’ ten to so’mak dio lu lalan.

⁴⁴MangkamoKomi urrampananna’ dio mai kasipakkanna to buda, sia Mipopangulunnamo’ ba’tu pira-pira bangsa; iatu bangsa tang kuperambu sae duka mengkaunan lako kaleku.

⁴⁵Mane narangi tu diona a’gangku, naturu’mi tu parentaku; sia iatu to salian bangsa naangga’-angga’i mengkanorong lako kaleku.

⁴⁶Iato to salian bangsa moro’mo tu kamatotoranna, anna ma’parondomo sun lan mai tambakukunna.

⁴⁷Iatu PUANG tuo sia mintu’na kadipudian lu lako nasang PUANG, buntu batungku, sia sipatu tu Puang Matua, oto’na kasalamarangku dipekalangka’I.

⁴⁸Iamotu Kapenomban, mangka umpopembala’na’, sia Ia tu umpopengkanorongmo ba’tu pira-pira bangsa lako kaleku,

⁴⁹Tu urrampananna’ dio mai mintu’ ualingku! Ondongpi Kamu duka umpamadaoanna’ na iatu mintu’ to umbalina’, sia Kamumo tu ullussuranna’ dio mai to masa’ga’.

⁵⁰Iamoto angku la umpudiKomi, O PUANG, dio lu mintu’ bangsa, sia la kupenanian pa’pudian tu sangamMi.

⁵¹Iamo umpakapua kadirampananna datunna, tu umpa’pekitanan kamarurusan lako to Natokko, Iamotu Daud sia bati’na tontong sae lakona!