Read Toraja-Sa'dan PA’PUDIAN 2 Bible Online

PA’PUDIAN 2 - Toraja-Sa'dan bible

PA’PUDIAN 2

¹Apara bannangna namarukka’ tu mai bangsa, sia ma’apari anna tangnga’ra apa tang kebattuan tu mintu’ to sangpetayanan?

²Mintu’na datu lan te lino sangtiangkarammo, sia mintu’nato paa samaturu’mo la unnea PUANG sia To NatokkoNa, nakua:

³Maikomi anta ka’tui tu pepungoNa, sia anta tibei tu ulangNa dio mai kaleta!

⁴Iatu To unnisung dao suruga la metaa, la Natelle-telle PUANG tu tau iato mai.

⁵Undinnato la ma’kada situang kasengkeanNa, sia Napatiramban kare’dekanNa tu tau iato mai:

⁶Manassa mangkamo Kupamatu’tun tu datungKu, dao Sion buntu maindanKu!

⁷La Kupokada tu lampa kadanNa PUANG: Mangkamo ma’kada lako Kaleku: Ikomo tu AnakKu; Akumo mangka undadiangko te allo totemo.

⁸Palakui lako Kaleku, angKu benko tu mintu’ bangsa la mupomana’, sia anggenna lino la mupoapa.

⁹Ammu nisak-nisakki tekken bassi, sia la mutesse-tesse susi kurin litak.

¹⁰Iamoto la kinaakomi, e mintu’ datu, sia Ma’perangikomi, e mintu’ to ma’parenta lino.

¹¹Mengkaolakomi lako PUANG situang kamatakuran, sia sende paimankomi situang kama’parondoan.

¹²Pangke’i tu Anak da Nasengke sia da misanggang dio lu lalan, belanna madomi’ re’dek tu ara’Na, maupa’ tu mintu’ to umposande’I.