Read Toraja-Sa'dan PA’PUDIAN 21 Bible Online

PA’PUDIAN 21 - Toraja-Sa'dan bible

PA’PUDIAN 21

¹Lu lakona pangala sengo. Pa’pudianna Daud.

²O PUANG, parannu paiman tu datu tu diona kuasamMi, sia tumba kalo’dokanna belanna kamakarimmanan lu dio mai Kalemi!

³Mibenmo tu lalan penaanna, sia tae’ Mitumpui tu palaku nasa’bu’ randan dipudukna. Sela

⁴Belanna Mipatammuimo rongko’ sanda maelo, sia Mipaluangimo makota bulaan tasak tu ulunna.

⁵Umpalaku katuoan mati’ amMi kamaseanni, ontongpi kamalamberan sunga’ tontong sae lakona.

⁶Kapuamo kamala’biranna belanna kasalamaran lu dio mai Kalemi, sia Mikamaseimo kadipangkeran sia kabarre — alloan.

⁷Belanna Mipatulangdanmo mendadi misa’ karongkosan, sia Mipasende paimanmo dio oloMi.

⁸Belanna nakatappa’i datu tu PUANG, sia diona kamasokananNa Patodoranna anna tae’ natilende’.

⁹La nalambi’ limamMi tu mintu’ ualimMi, sia la nalambi’ lima kananMi tu mintu’ to ungkabiri’Komi.

¹⁰La Mipabutung dapo’ nanii ma’lulu-lulu api tu tau iato mai, ke umpapayanKomi rupamMi. Puang la unnimbakanni kasengkeanNa tu tau iato mai, sia la namangsanni api.

¹¹La Misabu’i tu bati’na lan mai lino, sia lanto mimi’na lan mai mintu’ ma’rupa tau.

¹²Belanna tau iato mai la umpabu’tu kakadakean lako kalemi, untangnga’ kakelokan, apa tang nabela umpalanda’i.

¹³Belanna Mipatipero’mo sule tu tau iato mai, sia Miparundu’imo bulianMi tu lindona.

¹⁴BendanKomi lan kamatotoramMi! La menanikan umpakendekan pa’pudian kuasamMi.