Read Toraja-Sa'dan PA’PUDIAN 22 Bible Online

PA’PUDIAN 22 - Toraja-Sa'dan bible

PA’PUDIAN 22

¹Lu lakona pangala sengo. Unturu’ baenan sengo: Donga birang sipera’pa’ oni manuk. Pa’pudianna Daud.

²O Kapenombangku, o Kapenombangku, ma’apari Mitampemora’. Ma’apari Mitoyanganra Kalemi dio mai kadilendokangku, sia dio mai sarro budangku?

³O Kapenombangku, iake allona meongli’na’, apa tae’ Mimebali, sia iake mabonginna, tae’ duka angku rapa’.

⁴Apa Kamumo tu To maindan, tu umposali lentek kapa’pudi-pudianna to Israel.

⁵Kamumo nakatappa’i to doloki pirambongi’, nakatappa’imoKomi, amMi rampananni tu tau iato mai.

⁶Meongli’ tu tau iato mai lako Kalemi anna makarimman, Kamumo nakatappa’i anna tae’ nakasirisan.

⁷Apa aku te balina’ misa’ kalinting, tangia tolino, misa’ pa’be’seanna tolino, sia nakagi’gi’ to kamban.

⁸Minda-minda untirona’ nabe’sena’, sia nabellu’ina’ anna unniling-iling, nakua:

⁹Nasorongmo tu kamaparrisanna lako PUANG! Da’ito na Ia ungkarimmanni. Da’ito na Ia ullendokanni, belanna naala Ia penaanNa!

¹⁰Kamumo tu mangka umpatibussanna’ lan mai pa’tambukan, Kamu umpamamma’ manamanna’ lako to’ susunna to mendadiangku.

¹¹Dipa’pebarakkanammo’ mati’ Kalemi randuk lan mai pa’tambukan, sia Kamumo tu Kapenombangku tempon lan mai patindoan taunna indo’ku.

¹²Da Mitoyanganna’, pa merrandanmo tu kamaparrisan, belanna tae’ misa’ to pantunduan.

¹³Ba’tu sangapa tedong laki untikuimo’, penamile mawatang dio mai Basan ussikarupuimo’.

¹⁴Pada napengangai nasangmo’, butung to singa ma’kase’bu-se’bu sia unnurrung.

¹⁵Aku te butungna’ uai tibollo, sia iatu mai bukungku silesangan; sia ia duka tu penaangku butung to panti’, lollo’ lan ba’tangku.

¹⁶Iatu kamabukuangku marangkemo butung bibang, sia iatu lilaku la’ka’ lako lingaroku; amMi parokkona’ to’barra-barra’ kamatean.

¹⁷Belanna ba’tu pira-pira tu asu untama tikuina’, sia natalimbung tamamo’ sangtuntunan to ma’gau’ kadake, nalo’po’ tu limangku sia lentekku.

¹⁸Mintu’ bukungku ma’dinmo kubilang, natiro-tiro bangna’ tau iato mai, sia ma’pallak untirona’.

¹⁹Nasitaa-taai tau iato mai tu tamangkaleku, sia nasire’tekki tu bayu lamba’ku.

²⁰Apa iatu Kamu, o PUANG, da Mitoyang, o oto’ kamatotorangku, madomi’moKomi untunduina’.

²¹Rampananni tu sumanga’ku dio mai bassi mataran, sia lussuranni dio mai kamasa’garanna asu tu sunga’ tungga’ku.

²²Lussuranna’ dio mai sadang singa, sia dio mai tanduk tedong lampung. Mipebaliimo’.

²³La kupa’peissanan tu sangamMi lako mintu’ sangsiulurangku, sia lan lu kombongan la kunii umpudiKomi.

²⁴E kamu mintu’ to ungkataku’ PUANG, pudiMi, e kamu mintu’ tarukna Yakub pakala’bi’Mi, sia kasiri’I, e mintu’ bati’na Israel!

²⁵Belanna tae’ Nasanga maraai sia tae’ Napopa’elo’nai tu kamaparrisanna to dipandasa, sia tae’ Nabunianni tu lindoNa, sangadinna iatonna metamba lako Natananni duka talinga.

²⁶Lu mati’ Kalemi tu kapa’pudi-pudiangku lan lu kombongan kalua’, sia iatu pangallonangku la kupalesso’ dio tingayona to ungkataku’ Puang.

²⁷Iatu to umpamadiongan penaanna la kumande sadia’na, sia mintu’ to undaka’ PUANG la umpudiI. Sangapaoi anna paya tu sumanga’mi tontong sae lakona.

²⁸Mintu’ randan langi’ la mengkilala, anna sule umpengkara’pai PUANG. Sia mintu’ suku bangsa la tukku dio oloNa.

²⁹Belanna iatu kadatuan PUANG tu ampunna; Iamo pekapuanganna mintu’ bangsa.

³⁰Mintu’ to mala’bi’ lan te lino la kumande sia umpenombai; sia mintu’ to sulemo lako litak la tukku dio oloNa, iamotu to tang nakulle ungkarimmanni deatanna.

³¹Mintu’ bati’ la mengkaola lako Kalena, sia lako osso’ sipapa’na la nauleleanan tau tu diona Puang.

³²Sia la napa’peissanan tau tu kamaloloanNa Puang lako to la dadi undi, belanna Iamo mangka umpogau’i to.