Read Toraja-Sa'dan PA’PUDIAN 25 Bible Online

PA’PUDIAN 25 - Toraja-Sa'dan bible

PA’PUDIAN 25

¹Pa’pudianna Daud. O PUANG, mati’ Kalemi kunii umpassare penaangku.

²O Kapenombangku, Kamumo kukatappa’i; ke ma’dinni da angku kasirisan, sia da nasende paiman tu ualingku diona kataloangku.

³Manassa mintu’ to untayanKomi tae’ nala kasirisan, sangadinna iari tu to umpogau’ kelok tu tae’ bannangna, iamoto tu la kasirisan.

⁴O PUANG papayananna’ tu mai batattaMi, sia ada’ina’ tu mai lalanMi!

⁵Palolangna’ lan kamanapparamMi sia ada’ina’, belanna Kamumo tu Puang Matua, oto’na kasalamarangku, sia kupeagiKomi keallo-keallo.

⁶O PUANG, kilalai tu mintu’ mamaseMi sia mintu’ kamasokanamMi, belanna mintu’nato matontongan tempon dio mai.

⁷Da Mipalan ara’i tu mintu’ kasalangku tongku mangura sia mintu’ kapatodo-tintingangku, sangadinna kilalaina’ sitinaya pa’kamaseamMi, belanna kamasokanamMi, o PUANG.

⁸Iatu PUANG masokan sia manappa’, iamoto anNa ada’i lalanNa tu to kasalan.

⁹Ia umpalolang to umpamadiongan penaanna lan katonganan, sia la unnada’i lalanNa tu to umpamadiongan penaanna.

¹⁰Mintu’ lalanna PUANG iamo kamaturu-turuan sia kamarurusan, lako to ungkaritutui basseNa sia mintu’ kasa’bianNa.

¹¹Tete dio sangamMi, o PUANG, pagarri’i tu kedo kadakeku, belanna kapuamo.

¹²Mindara tu to ungkasiri’ PUANG? iamotu to la Napatudu lako lalan umbanna tu sipatu natonno’.

¹³Iatu deatanna la torro manaman, sia mintu’ bati’na la umpomana’ padang.

¹⁴Iatu kada rasianNa PUANG lu lako to ungkasiri’I, sia iatu basseNa la dipasombo lako.

¹⁵Tontong bang tu matangku mentingara langngan PUANG, belanna Ia urriu’ lentekku lan mai porro’.

¹⁶Sailena’ sia katuru-turuina’, belanna disitampeina’ sia maparri’na’.

¹⁷Sakerangan-rangannamo tu kamagiangan penaangku, alaina’ lan mai mintu’ karossoangku.

¹⁸Tiromi tu kamaparrisangku sia kamapa’dirangku, sia pa’deimi tu mintu’ kasalangku.

¹⁹Tiromi tu mintu’ ualingku, belanna tang dikemba’mo, sia tang pada re’dekna ara’na ungkabiri’na’.

²⁰Rinding pala’i tu deatangku sia rampananna’; da angku kasirisan, belanna Kamu kupentionganni.

²¹Sangapaoi anna rondongna’ kamengkaolan sia kabulo-lollongan, belanna kutayanKomi.

²²O Puang Matua, lendokanni tu to Israel, Lan mai mintu’ kamaparrisanna!