Read Toraja-Sa'dan PA’PUDIAN 26 Bible Online

PA’PUDIAN 26 - Toraja-Sa'dan bible

PA’PUDIAN 26

¹Pa’pudianna Daud. O PUANG, sanda tongannina’, belanna lolang malolomo’, sia lantukna’ ungkatappa’i PUANG.

²Sudina’, o PUANG sia sandakna’! Sia sudii tu ba’tengku sia penaangku.

³Belanna iatu kamasokanamMi dio bang lindoku, sia tontongna’ lolang lan kamanapparamMi.

⁴Tae’ kusango’koran len to leko’ penaanna, sia tae’ kusiayoka len to belo puduk.

⁵Kukabiri’ tu kombonganna to umpogau’ kakadakean, sia tae’ kusango’koran to tang mekaaluk.

⁶Kubasei tu limangku tanda tasikku masero pindan, kumane ullilingi inan pemalaramMi, o PUANG!

⁷Angku pa’perangianan pa’pudi-pudian. Sia unnuleleanan mintu’ penggauran kalle-kalleamMi.

⁸O PUANG, kukamali’ tu inan banuamMi, sia inan nanii kamala’biramMi.

⁹Da Mipasialai deatanna to kadake gau’na tu deatangku, ba’tu sunga’ku na sunga’na to umpato’do rara.

¹⁰Lan lisu pala’na den kakadakean, sia iatu lima kananna ponno pappe’.

¹¹Apa iate aku te lolang malolona’, lendokanna’ sia katuru-turuina’,

¹²Iatu lentekku mellese dio to’ inan lappa’, sia lan lu kombongan la kunii umpudi PUANG.