Read Toraja-Sa'dan PA’PUDIAN 27 Bible Online

PA’PUDIAN 27 - Toraja-Sa'dan bible

PA’PUDIAN 27

¹Pa’pudianna Daud. PUANGmo tu arrangku sia oto’na kasalamarangku, mindapara la kukataku’? PUANGmo tu tambakukunna sunga’ku, mindapa la kukagiang?

²Iatonna laoina’ to kadake la morai ungkande duku’ku, iamotu mintu’ balingku sia ualingku, titodomi anna sumpandan.

³Moi natingoina’ sangtuntunan to parari, tae’ namataku’ tu penaangku; moi anna titanan tu ra’ untingoina’, tontong dukana’ ma’passare.

⁴Misa’ tu mangka kupalaku dio mai PUANG; iamoto tu la kutuntun, kumua: angku ma’din torro lan banuanNa PUANG angge tuoku, la untiro lindo kamasokananNa PUANG, sia unnannungi tu iannato lan banua kabusunganNa.

⁵Belanna iake nalambi’na’ kamaparrisan Napalanna’ barungNa, sia Narerungna’ lan ongan tendaNa, Napakendekna’ langngan buntu batu.

⁶Na totemo natongloi ulungku tu mintu’ ualingku tiku lao. Sia la umpemalaranna’ pangurandean situang arrak lan tendaNa, la sumengona’ sia la kupenanian pa’pudian tu PUANG.

⁷Perangiina’, o PUANG, ke metambana’, katuru-turuina’ sia pebaliina’.

⁸Penaangku unturu’i tu kadamMi, kumua: Daka’Na’ mipellindoiNa’. La kudaka’Komi, KupellindoiKomi, o PUANG.

⁹Da Mibunianna’ tu lindoMi, sia da Misualei tu taumMi napobua’ kasengkeamMi. Kamumo tu kupopatunduan; da Mitibena’ sia da Mitampena’, o Puang Matua, oto’na kasalamarangku.

¹⁰Belanna natampemo’ indo’ ambe’ku, apa PUANG untarimana’.

¹¹Ada’ina’ tu lalanMi, o PUANG, sia solanna’ lako lalan malolo, tu belanna mintu’ to umbalina’.

¹²Da Misorongna’ lako pa’poraianna mintu’ balingku, belanna ba’tu pira-pira sa’bi tang tongan umbalina’, sia to umpenaan kamasa’garan.

¹³Iake susinna tae’ kupatonganni la untiro kamasokananNa PUANG lan tondok to tuo!

¹⁴Peagimi tu PUANG, melo ke batta’ko, sia kalebu penaammu. Sia peagimi tu PUANG.