Read Toraja-Sa'dan PA’PUDIAN 33 Bible Online

PA’PUDIAN 33 - Toraja-Sa'dan bible

PA’PUDIAN 33

¹La sila’tekangkomi umpakaraya PUANG, e mintu’ to bulo sanglampa, Iatu pa’pudi-pudian bayu sielle’na to ma’bulo lollong.

²PudiMi tu PUANG naturu’ oni katapi, sia penanianNi pa’pudian naturu’ dandi sangpulo ritinna.

³PenanianNi Puang tu sengo ba’ru, pemellongi tu dedekna sia pemandui.

⁴Belanna iatu kadanNa PUANG manappa’, sia mintu’ penggauranNa maruru’;

⁵Naporai Puang tu kamaloloan sia kaunnolaian salu, iate lino ponno kamasokananNa PUANG.

⁶Tete dio kadanNa PUANG anna kombong tu mai langi’, susi dukato tu mintu’ mengkaponanna dao langi’ kombong tete dio angin sun dipudukNa.

⁷Napopa’misa tu mintu’ uai tasik butung misa’ patuku, sia mintu’ uai mandalan, Napatama pa’pannianna.

⁸Mintu’ lili’na lino la ungkataku’ PUANG, sia mintu’ issinna lino la ungkabangnga’I.

⁹Belanna ma’kada manna anna kombongmo, sumu manna anna limbongmo sangga mairi’.

¹⁰PUANG umpatangdanun pa’timbanganna mintu’ bangsa, sia undampa tangnga’na mintu’ to sangpetayanan.

¹¹Apa iatu pa’timbanganNa PUANG tang leluk sae lakona, sia iatu tangnga’na landa’ lako disituran-turananni.

¹²Maupa’ tu bangsa umpoKapenomban PUANG, iamotu to sangpetayanan mangka Napilei langsa’ Napotau misa.

¹³Mentiro lumbang tu PUANG dao mai suruga, mintu’ ma’rupa tau Nata’pai nasang matanNa.

¹⁴Dao mai inan Naisungi Nanii umpenunu mintu’ to untorroi kuli’na padang,

¹⁵Ia umpadadi penaanna tau iato mai, sia Napemantang tu mintu’ penggauranna.

¹⁶Misa’ datu tae’ anna umpopatalo kabudanna pa’baraninna, sia misa’ to lalong tae’ anna umpolussu’ katarru’-baranianna.

¹⁷Iatu darang misa’ parea tang lolo’ la umpabu’tu kapataloan, sia liu matoto’na tae’ nabelai merampanan.

¹⁸Manassa iatu matanNa PUANG tontong untiro to ungkataku’I, sia to umpeagi kamasokananNa Puang,

¹⁹La urrinding pala’ deatanna tau iato mai dio mai kamatean, sia la umpatuoi ke ra’pak padangi.

²⁰Deatangki untayan PUANG, Iamo Patunduangki sia balulangki.

²¹Iamoto naposendei penaangki, sia iamoto angki posande’i tu sanga maseroNa.

²²O PUANG, sangapaoi anna rondongkan kamasokanamMi. Susitu kadirannuanamMimo.