Read Toraja-Sa'dan PA’PUDIAN 34 Bible Online

PA’PUDIAN 34 - Toraja-Sa'dan bible

PA’PUDIAN 34

¹Pa’pudianna Daud tonna unna’ga to bomboan kalena dio olona Abimelekh, tu unnula’i anna mallai.

²La tontongna’ umpudi PUANG, sia iatu kapa’pudi-pudian lako tang tore sun dio pudukku.

³Iatu deatangku massattuan dio PUANG, sangapaoi anna rangii to umpamadiongan penaanna anna parannu-rannu!

⁴La mituru’na’ umpakapua PUANG, melo ke pada-padaki’ umpakala’bi’ sanganNa.

⁵Undaka’mo’ PUANG, anNa baliimo’, sia Narampanammo’ dio mai mintu’ kukataku’na.

⁶Iatu tau iato mai mentingara langngan Puang, anna mabaliga’ tu lindona belanna parannu, sia iatu lindona tae’ natodingi siri’.

⁷Iate to mandasa iate meongli’mo, anNa tananni talinga PUANG, sia Nalendokan, dio mai mintu’ kamaparrisanna.

⁸Iatu Malaeka’Na PUANG lumiling, ungkampai mintu’ to ungkataku’ Puang sia urrinding pala’ tau iato mai.

⁹Perasaimi sia tiromi, kumua iatu PUANG masokan; maupa’ tu to umpentirerungI.

¹⁰Kasiri’I, tu PUANG, e mintu’ to masallo’Na, belanna tae’ misa’ kapu’duranna tu to ungkasiri’I.

¹¹Iatu anak singa kapu’duran sia ussa’ding tangdia’, apa iatu to undaka’ PUANG tae’ nala kapu’duran len apa maelo.

¹²Maikomi, e kamu anakku umperangiina’, kuada’ikomi ungkasiri’ PUANG.

¹³Mindara morai tuo, sia ungkaduangi kamalamberan sunga’ anna tiroi tu maelona?

¹⁴Pakari’pii tu lilamu umpokada kadakena, sia iatu pudukmu da narandanni kalando-pa’duan;

¹⁵Lempanganni tu kakadakean sia pogau’i tu kameloan, daka’i tu kamarampasan sia ula’i.

¹⁶Iatu matanNa PUANG umpemantang to malambu’, sia natananni talinga tu peongli’na.

¹⁷Apa Natiro sengke tu to umpogau’ kakadakean, la umpa’dei lan mai lino tu kadilamban-bayo-bayoanna tau iato mai.

¹⁸Iake meongli’i tu to malambu’, Natananni talinga PUANG, sia Narampanan dio mai mintu’ kamaparrisanna.

¹⁹Iatu PUANG tang untoyangan to rantang buana sia ullendokanni tu to rosso penaanna.

²⁰Iatu to malambu’ buda kamandasanna, apa Narampanan PUANG dio mai mintu’nato.

²¹Ia ungkaritutui mintu’ bukunna, moi misa’ tae’na la dile’to.

²²Iatu to tang mekaaluk la mate narua kasanggangan, sia iatu to ungkabiri’ to malambu’ la dipakannai salu.

²³PUANG ullendokanni tu deatanna taunNa, sia tae’ misa’ tu to umpentionganNi la dipakannai salu.