Read Toraja-Sa'dan PA’PUDIAN 35 Bible Online

PA’PUDIAN 35 - Toraja-Sa'dan bible

PA’PUDIAN 35

¹Pa’pudianna Daud. O PUANG, ualii tu to unnualina’, sia rarii tu to urrariina’.

²ToeKomi balulang sia pakolong, ke’de’Komi untunduina’.

³Tetangi tu doke sia la’bo’ amMi ampangi tu lalanna to unnula’na’. Kuanni te deatangku: Akumo pakarimmanammu!

⁴Melo ke kasirisanni sia lele bekoi tu to undaka’ lalan la ungka’tu sunga’ku, sia la sorong boko’ sia natoding siri’ tu mintu’ to undakaranna’ kakadakean.

⁵Da’ito anna susi nasang ta’pian napentiaran angin, anNa lolai Malaeka’Na PUANG.

⁶Da’ito anna malillin sia malangngo’ tu lalanna tau iate mai, anNa ula’i Malaeka’Na PUANG.

⁷Belanna tae’ bannangna anna tananni bunina’ poyana, sia tae’ bannangna anna garaganni patuang lambe’ tu deatangku.

⁸Da’ito narampoi kasanggangan tang nakanandai, sia ia kalena naala poya natanan buni, da’ito anna tobang tama kasanggangan.

⁹Iatu deatangku mela’tek dio PUANG, sia la sende paiman diona kadilendokan lu dio mai Kalena.

¹⁰Mintu’ kaleku sae tama bukungku la ma’kada kumua: O PUANG, mindara tu sitinti batumMi, urrampanan to mandasa dio mai to ussau’i, ondongpi to mandasa sia to bongko dio mai to umpangrampai?

¹¹Bendanmo ba’tu pira-pira sa’bi bulituk, untanda’na’ diona apa tang kutamai.

¹²Napapakkanni kakadakean tu gau’ meloku; sia sisayuranna’ anak, kuurunganni makarorrong.

¹³Apa iatu aku tonna masaki tau iato mai, ma’pakean karoro’na’, umpandasana’ kaleku ma’puasa, sia tu’tun tama ara’ku tu ulungku massambayang.

¹⁴Iatu gau’ku lako susi lako sangmaneku ba’tu siulu’ku; tukkuna’ ma’pote dibolong, butung to untingayo pandana mendadianna.

¹⁵Apa iatongku tilende’, parannumi ma’balole’-lole’ tu tau iato mai; to passiboboran tu tae’ kutandai umbalole’na’; tau iato mai tang tore ungkada-kadaina’.

¹⁶Susi to tang mekaaluk patelle-telle sia umbarakki kande mammi’, ussangiranna’ isi.

¹⁷O PUANG, sangapapoKomi la untiro-tiro bangi? Lendokammi tu deatangku dio mai kasangganganna, sia rampananni tu sunga’ tungga’ku dio mai mintu’ anak singa.

¹⁸La kupudiKomi lan kombong kalua’, sia la kupakala’bi’Komi lan tinimbu malambe’.

¹⁹Da anna parannu tu to tae’ bannangna nanii unnualina’, sia da maro’ Mieloranni tu to ungkabiri’ punala bangna’ untelle-tellena’ pa’kidi’ matanna.

²⁰Belanna tangia kamarampasan napokada tau iato mai, sangadinna untangnga’ apa tang tongan, lako mintu’ to rapa’ lan tana iate.

²¹Nabakkak tongan tu sadangna umpengangaina’, anna ma’kada, kumua: Ha, ha, natiromo matangki.

²²Mitiromo to, o PUANG, da Mima’pakappa bang; o Puang, da Mitoyanganna’.

²³Ke’de’Komi sia ingaranni ussanda tongannina’, diona kara-karaku, o Kapenombangku sia Puangku.

²⁴O PUANG, o Kapenombangku, paolaina’ salu sitinaya kamaloloamMi. Da anna poparannui tau iato mai tu diona a’gangku.

²⁵Da anna ma’kada lan penaanna, kumua: Ha! susimo pa’poraiangki to! Sia da anna ma’kada kumua: Kiampello’mo!

²⁶Da’ito anna kasirisan sia maila’ tu mintu’ to umposende kamandasangku, da’ito naputu’i siri’ sia kaburerean, tu to umpamatampo kalena lako kaleku.

²⁷Melo ke mela’tekki sia sende paimanni tu mintu’ to umporai tu kaunnolaiangku salu; sia la tontong napokada kumua: Kapua paanNa tu PUANG. Tu umporai taunNa ke unnappa’i kasalamaran.

²⁸La nasa’bu’ tongka’ dililaku tu kamaloloamMi, sia kadipudiamMi kiallo-kiallo.