Read Toraja-Sa'dan PA’PUDIAN 36 Bible Online

PA’PUDIAN 36 - Toraja-Sa'dan bible

PA’PUDIAN 36

¹Lu lakona pangala sengo. Pa’pudianna Daud, taunNa PUANG.

²Iatu kasalan ma’kada lan ba’tengna to tang mekaaluk; — tae’ bang kamatakuran lako Puang Matua dio lindona —

³Belanna naa’panmo ia kasalan tu penaanna, diona kaungkanassan, kumua sipatu la dikabiri’ tu kakadakeanna.

⁴Mintu’ tu kada sun dio pudukna kakadakean manna sia kalando-pa’duan manna, tae’mo anna lolang kinaa sia tae’mo anna pogau’ kameloan.

⁵Untangnga’ bang kabulitukan diong dali’ patindoanna, anna ola lalan kadake, sia tae’ narampananni tu kakadakean.

⁶O PUANG iatu kamasokanamMi sumpu langngan langi’, sia iatu kamarurusamMi tu’tun dao massaliu’na.

⁷Ia duka tu kamaloloamMi susitu mai buntu sumpu malangka’, sia pa’paolaimMi salu ten to tasik mandalan liu. O PUANG, Kamumo tu ullendokanni tu tolino sia olo’-olo’.

⁸Tumba melona tu kamasokanamMi, o Puang Matua, mintu’ ma’rupa tau umpentionganni ongan pani’Mi.

⁹Tau iato mai la dipedia’i sanda mammi’na lan banuamMi, sia la Mipairu’ dio mai to’ salu marasamMi.

¹⁰Belanna dio Kalemi den tu kalimbuang katuoan, sia lan arrangMi kinii untiro kamasiangan.

¹¹Patontongi tu kamasokanamMi lako to untandaiKomi sia kamaloloamMi lako to bulo lollong penaanna.

¹²Da Mipopa’elo’nai tu to matampo ullesena’, sia da Mipopa’elo’nai tu to tang mekaaluk ullolaina’.

¹³Indemoto nanii tibambang tu mintu’ to umpogau’ kakadakean, dibambangammo rokko tu tau iato mai sia tang nakullemo bangun sule.